İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 562 Hüküm no: 729 Orijinal metin no: [65a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Muharrem’in, Şaban b. Ahmed’e olan borcunu ödemesi gerektiği Men‘ Mahmiye-i İstanbul’da Büyük Karaman’da Şaban b. Ahmed nâm kimesne meclis-i şer‘de Mustafa b. Muharrem mahzarında üzerine da‘vâ edip târih-i kitâbdan bir sene mukaddem bakkallık san‘atında sermâye etmek için mezbûr Mustafa’ya otuz bin akçe ikrâz ve teslîm eyledikden sonra yirmi bin akçesin yedinden alıp kabz edip bâkī kalan on bin akçeyi dahi mezbûreden taleb ederim, suâl olunsun dedikde gıbbe’s-suâl, mezbûr Mustafa cevâbında mezbûrdan otuz bin akçe iktirâz ve kabz eyledikden sonra meblağ-ı mezbûrun yirmi dokuz bin akçesin yedimden kabz edip hattâ yirmi dokuz bin akçesin alıp kabz eyledim hâlâ meblağ-ı mezbûrun zimmetinde bin akçe alacağım bâkī kalmadı deyû ikrâr dahi etmiş idi deyû def‘ ile mukābele eyledikde gıbbe’l-istintâk ve’l-inkâr mezbûr Mustafa’dan def‘-i mezbûru için beyyine taleb olundukda udûl-i müslimînden el-Hâc Ali b. Mustafa ve Ali b. Mehmed ve Osman Beşe b. Yusuf nâm kimesneler li ecli’ş-şehâde meclis-i şer‘a hâzırûn olup gıbbe’l-istişhâd fi’l-vâki‘ mezbûr Mustafa’ya karz verdiğim otuz bin akçenin yirmi dokuz bin akçesini mezbûrdan alıp kabz edip zimmetinde bâkī bin akçe alacağım kaldı deyû huzûrumuzda ikrâr eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın meblağ-ı bâkī bin akçeyi mezbûr Şaban’a edâya mezbûr Mustafa’ya tenbîh olundukdan sonra mezbûr Şaban dahi bî-vech mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’r-râbi‘ aşer min Saferi’l-hayr li sene 1074. Şuhûdü’l-hâl: Mehmed Çelebi b. Mehmed el-Müezzin, Mehmed b. Hasan, Hüseyin Efendi el-Brusî, Abdi Çelebi b. Hüseyin, Şükür Bey b. Mustafa, Ahmed Çelebi b. Mustafa.