İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 564 Hüküm no: 732 Orijinal metin no: [65b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dilsiz Ömer b. Mehmed’in ölümüyle, vârislerinden Hasan b. Ahmed ile kızı Sâliha arasındaki miras mes’elesinin sulh ile sonlandırıldığı Sulh Mahmiye-i İstanbul’da Sultân Bayezid mahallesinde fevt olan bî-zebân Ömer b. Mehmed’in verâseti, sulbiye kebîre kızı Sâliha ile ammi oğulları Abdurrahman Çelebi ve el-Hâc Abdi b. Muslu ile Hasan b. Ahmed’e münhasıra olduğu şer‘an zâhir ve müte‘ayyin oldukdan sonra, mezbûr Hasan meclis-i şer‘de kendi tarafından asîl ve zevcesi mezbûre Sâliha tarafından husûs-ı âti’l-beyâna sâbitü’l-vekâle vekîl olan Abdurrahman Çelebi muvâcehesinde ikrâr ve takrîr-i kelâm edip mûrisimiz hayâtta iken mecnûn ve a‘mâ olup mezbûre Sâliha kıbel-i şer‘den vasî ta‘yîn olundukdan sonra malından külle yevm yirmişer akçe nafaka farz ve takdîr ettirmişdi hâlâ mezbûr Ömer fevt oldukda mecmû‘-ı terekesinden hisse-i şer‘iyyemi mezbûrlardan da‘vâ eylediğimde mezbûre Sâliha cevâbında mezbûr Ömer’e vech-i meşrûh üzre yevmî yirmişer akçeden yevm-i vefâtına gelince kendi malından on bir senede yetmiş beş bin iki yüz akçe nafaka ve kisvesine harc ve sarf edip ve doksan dört bin seksen akçe dahi bi’l-izni’ş-şer‘î Ayasofya-i Kebîr vakfından olup Bezzâzistân kurbunda iki bâb dükkân ve Davud Paşa iskelesinde bir bâb dükkân ve Samadya kapısı kurbunda bir bâb dükkân ve Saraçhâne’de olan bir bâb icâre-i mu‘accelelü dükkânların binâsına harc ve sarf eyledim. Müteveffâ-yı mezbûrun kendi sâkin olduğu menzilinden gayrı bir akçe ve bir habbe terekesi yoktur dedikde ben dahi mezbûrun nafakasiyçün başka ta‘âm tabh etmedin ve zikr olunan dükkânların binâsına ol mikdâr akçe harc etmedin deyip beynimizde küllî nizâ‘ vâki‘ olmuşdur. El-hâletü hâzihî tavassut-ı muslihîn ile da‘vâ-yı mezbûrumdan beni mezbûrlar otuz esedî guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr otuz esedî guruşu vekîl-i mezbûr Abdurrahman Çelebi yedinden tamâmen ahz u kabz edip müteveffâ-yı mezbûrun eğer akār ve menkūl ve sâir ism-i mal ıtlâk olunur cemî‘ terekesine müte‘allika da‘vâdan müvekkile-i mezbûre Sâliha Hâtun ile mezbûr Abdurrahman Çelebi’nin zimmetlerini ibrâ ve iskāt eyledim dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min Saferi’l-hayr li sene erba‘a ve seb‘în ve elf. Şuhûdü’l-hâl: Mehmed Efendi b. Kurt el-İmâm, Abdullah Çelebi b. Mehmed Efendi, Mehmed Beşe b. Abdullah, Hüseyin Beşe el-Hâc Mahmud, Muslu Çelebi b. ( ), el-Hâc Sun‘î b. Ebûbekir, Hüseyin Çelebi b. el-Hâc İbrahim, Mehmed Bey b. el-Hâc İbrahim, Haydar Beşe b. Abdullah, Mehmed Çelebi b. Hasan Bey, Mehmed Çelebi b. Mahmud, Hasan Efendi b. Mehmed ve gayruhüm.