İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 586 Hüküm no: 766 Orijinal metin no: [68b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Dimitri ve Elizo v. Harito’nun, Bakkal Yani v. Yorgi’ye olan borç anlaşmazlığında sulh oldukları Sulh Mahmiye-i İstanbul’da Camcı çeşmesi kurbunda sâbıkan bakkal olan Yani v. Yorgi nâm zimmî mahfil-i kazâda, yine tâife-i mezbûreden işbu bâ‘isü’s-sifr Yorgi v. Dimitri ve Elizo v. Harito nâm zimmîler muvâcehelerinde ikrâr ve takrîr-i kelâm edip mukaddemâ zikr olunan çeşme kurbunda ben bakkal iken dükkândan çıkıp merkūmân zikr olunan dükkâna girdiklerinde üç yüz vakıyye peynir ile bin akçelik zeytinimi semen-i misilleri ile bey‘ ve semenini bana teslîm eylen deyû mezbûrelere teslîm etmiş idim hâlâ mezbûrândan semenlerin da‘vâ ve taleb eylediğimde anlar dahi inkâr etmeleri ile beynimizde münâza‘ât-ı kesîre ve muhâsamât-ı şedîde vâkı‘a olmuş idi el-hâletü hâzihî vesâtat-ı muslihîn ile da‘vâ-yı mezbûremden merkūmân beni yüz elli akçe üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yüz elli akçeyi merkūmân yedlerinden tamâmen ahz u kabz edip husûs-ı mezbûra müte‘allika da‘vâdan mezbûrânın zimmetlerini ibrâ-i âmm-ı kātı‘ü’n-nizâ‘ ibrâ ve iskāt eyledim [69a] dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min Saferi’l-hayr li sene 1074. Şuhûdü’l-hâl: Abdi Çelebi b. Hüseyin, Baba Resûl b. Rıdvan, Şükrullah b. Mustafa, Ahmed b. Abdülcebbar, el-Hâc Ahmed b. Abdullah, Bayram Beşe b. Abdullah, Kosta v. Corca, Nikola v. Dimo, Manol v. Yorgi, Laskari v. Dimitri, Panayot v. Todori.