İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 585 Hüküm no: 765 Orijinal metin no: [68b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mehmed Çelebi’ye borcu olan Mehmed Çelebi b. Mehmed’in, bunu vasî Ali Çelebi’ye ödemesi gerektiği İsbât-ı verâset Mahmiye-i İstanbul’da ( ) mahallesinde sâkine i[k]en vefât eden Fâtıma bt. Mehmed Çelebi nâm hâtun ber vech-i âtî hasren verâset iddi‘â eden Divâne Mehmed Efendi’nin kıbel-i şer‘den mansûb vasîsi olan sulbî kebîr oğlu Ali Çelebi meclis-i şer‘de Mehmed Çelebi b. Mehmed nâm kimesne mahzarında bi’l-vesâye üzerine da‘vâ edip müteveffât-ı mezbûre Fâtıma Hâtun’un mezbûr Mehmed Çelebi zimmetinde câriye semeninden beş bin akçe hakkı olup meblağ-ı mezbûru kable’l-ahz vefât edip babam mezbûr Mehmed Efendi müteveffât-ı merkūme Fâtıma Hâtun’un li ebeveyn ammizâdesi ve hasren vârisi olup zîrâ müteveffât-ı mezbûre Fâtıma Hâtun’un babası mezbûr Mehmed Çelebi ve onun dahi babası Topal Hüseyin ve babam mezbûr Mehmed Efendi’nin babası Mehmed Efendi ve onun babası Ali Çelebi ve mezbûr Ali Çelebi ile Topal Hüseyin li ebeveyn karındaşlardır, babaları Sâlih ve anaları Emine ve mezbûr Sâlih’in babası Ahmed olup meblağ-ı mezbûr irsen babam mezbûr Mehmed Efendi’ye intikāl etmekle mezbûr Mehmed Çelebi’den taleb ederim suâl olunsun dedikde gıbbe’s-suâl mezbûr Mehmed Efendi cevâbında müteveffât-ı mezbûre Fâtıma Hâtun vech-i muharrer üzre beş bin akçe deyni olduğun ikrâr, lâkin mezbûrun verâsetini inkâr eyledikde vasiyy-i mezbûrdan müdde‘âsı için beyyine taleb olundukda udûl-i müslimînden Yenikapı kurbunda Evliyâ mahallesi ahâlîsinden Mustafa Çelebi b. İbrahim ve Gül Câmi‘i mahallesinde sâkin Mehmed Çelebi b. Ahmed nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ vasiyy-i mezbûr Ali Çelebi’nin babası mezbûr Divâne Mehmed Efendi müteveffât-ı merkūme Fâtıma Hâtun’un li ebeveyn ammizâdesidir, zîrâ müteveffât-ı merkūmenin babası mezbûr Mehmed Çelebi’nin babası Topal Hüseyin ve mezbûr Mehmed Efendi’nin babası merkūm Mehmed Efendi ve onun babası Ali Çelebi ve mezbûr Ali Çelebi Topal Hüseyin ile li ebeveyn karındaşlar olup babaları mezbûr Sâlih Çelebi anaları Emine ve mezbûr Sâlih’in babası merkūm Ahmed’dir, verâseti mezbûr Mehmed Efendi’ye münhasıradır, bundan gayrı vârisi olduğu ma‘lûmumuz değildir, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın meblağ-ı mezbûru vasiyy-i mezbûra edâya mezbûr Mehmed Çelebi’ye tenbîh birle mâ vaka‘a bi’t-taleb ketb olundu. Fi’l-yevmi’l-ışrîn min Saferi’l-hayr li sene erba‘a ve seb‘în ve elf. Şuhûdü’l-hâl: Fahrü’l-akrân Mustafa Çelebi, Ömer Efendi b. Osman, Hayrullah Çelebi b. Mehmed, Ahmed Çelebi b. Mahmud, çukadar Ali Beşe, Mustafa Beşe er-Râcil es-Sarrâc, Mehmed b. Ramazan, Baba Resûl b. Rıdvan.