İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 710 Hüküm no: 952 Orijinal metin no: [92a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Franko v. Yorgi’nin terekesinden gizlice akçe alan Yorgi v. Andriye’nin vâris olan Yani v. Yorgi’nin hissesini vermesi gerektiği Havâss-ı Refî‘a müzâfâtından Terkos nâhiyesine tâbi‘ Belgrad nâm karyede sâkin iken bundan akdem hâlik olan Franko v. Yorgi’nin verâseti, zevce-i metrûkesi Yamatoya bt. Yorgo nâm nasrâniyyeye ve sadriyye kebîre kızı İşar[o] nâm nasrâniyyeye ve li ebeveyn er karındaşı Yani’ye münhasıra olduğu şer‘an mütehakkik oldukdan sonra mezkûretân tarafından husûs-ı âti’z-zikre vekîl olup bakkal tâifesinden Danyal v. Franko ve Yani v. Franko nâm zimmîler şehâdetleri şer‘an vekâleti sâbite olan Yani v. Yorgi nâm zimmî mahfil-i kazâda, mezkûre İşaro’nun zevci Yorgi v. Andriye nâm zimmî muvâcehesinde bi’l-vekâle üzerine takrîr-i da‘vâ edip hâlik-i mezbûrun terekesinden mezkûr Yorgi hafiyyeten altmış bin [akçe] ahz u kabz edip hattâ vech-i muharrer üzre ahz u kabzı alâ re’si’l-işhâd ikrâr ve i‘tirâf etmişdir, ol vechile meblağ-ı mezbûrdan müvekkilim mezbûr Yani’ye yirmi iki bin beş yüz akçe irsen isâbet etmeğin hâlâ meblağ-ı mezbûr yirmi altı bin beş yüz akçeyi müvekkilim için mezbûr Yorgi’den taleb ederim, suâl olunsun dedikde gıbbe’s-suâl ve akībe’l-inkâr, vekîl-i mezbûrdan müdde‘âsını mübeyyine beyyine taleb olundukda bakkal tâifesinden Yani v. Kokol ve Yorgi v. Nikola ve Yani v. Nikola nâm zimmîler li ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ işbu Yorgi hâlik-i mezbûr Niko’nun terekesinden hafiyyeten altmış bin akçe aldım deyû huzûrumuzda ikrâr eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince ba‘de’l-hükm meblağ-ı mezbûr yirmi iki bin beş yüz akçeyi vekîl-i mezbûra edâya mezbûr Yorgi üzerine hükm olunup mâ vaka‘a bi’t-taleb ketb olundu. Fi’l-yevmi’l-ışrîn min şehri Rebî‘ilevvel li sene erba‘a ve seb‘în ve elf. Şuhûdü’l-hâl: Mustafa Çavuş b. Abdullah el-Mübâşir, Abdi Çelebi b. Hüseyin, el-Hâc Ahmed b. Mahmud, Veli b. Mahmud ve gayruhüm mine’l-huzzâr.