İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 714 Hüküm no: 959 Orijinal metin no: [93a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Franko v. Yorgi’nin vârislerinin hisselerine düşen miras haklarını aldıkları Havâss-ı Aliyye müzâfâtından Terkos nâhiyesine tâbi‘ Belgrad nâm karyede sâkin iken hâlik olan Franko v. Yorgi’nin verâseti, zevce-i metrûkesi Yamatoya bt. Yorgo ve sulbiye kızı Litaro ve li ebeveyn er karındaşı Yani’[ye] münhasıra olduğu şer‘an mütehakkik oldukdan sonra merkūm Yani tarafından alâ mâ hüve nehcü’s-sübût sâbitü’l-vekâle vekîl olan diğer Yani v. Yorgi nâm zimmî hâlik-i mezbûrun kızı merkūme Litaro’nun zevci işbu râfi‘ü’s-sifr Yorgi v. Andriye nâm zimmî muvâcehesinde ikrâr ve takrîr-i kelâm edip merkūm Yorgi hâlik-i mezbûrun terekesinden altmış bin akçe ketm u ihfâ eylediğine ikrârını bundan akdem vekâletim hasebiyle meclis-i şer‘-i hatîr-i lâzımü’t-tevkīrde muvâcehesinde şuhûd-ı udûl ile isbât eylediğimde meblağ-ı merkūmdan müvekkilim Yani’nin bi hasebi’ş-şer‘ hissesine isâbet eden yirmi iki bin beş yüz akçe mezbûr Yorgi’den hükm olunup yedime hüccet-i şer‘iyye verilmiş idi. Hâliyâ ol hüccet-i şer‘iyye mûcebince müvekkilim merkūm Yani’ye isâbet eden yirmi iki bin beş yüz akçeyi mezbûr Yorgi’den vekâletim hasebiyle bi’t-tamâm alıp kabz eyledim dedikde gıbbe’t-tasdîki’l-vicâhî, mâ vaka‘a bi’t-taleb ketb olundu. Fi’l-yevmi’s-sânî min şehri Rebî‘ilâhir li sene erba‘a ve seb‘în ve elf. Şuhûdü’l-hâl: Mehmed Çelebi b. Muharrem, Ramazan Beşe b. Abdullah, Hasan Çelebi b. Mahmud, Mustafa Çavuş el-Mübâşir, Abdi Çelebi b. Hüseyin ve gayruhüm.