İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 741 Hüküm no: 1001 Orijinal metin no: [99a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Piyâle Bey b. Abdullah’ın borçlarını ödemek için vârislerinin arsasını Veli Bey b. Hasan’a sattıkları Mahmiye-i İstanbul’da Kazgancı Sadi mahallesinde sâkin iken bundan akdem vefât eden Piyâle Bey b. Abdullah’ın verâseti, zevce-i menkûhası Ayşe bt. Mehmed nâm hâtun ile sulbî oğlu Ahmed’e münhasıra olduğu şer‘an zâhir ve müte‘ayyin oldukdan sonra mezbûre Ayşe Hâtun asâleten ve sagīr-i mezbûrun tesviye-i umûruna kıbel-i şer‘den mansûb vasîsi Mahmud Efendi b. Şaban vesâyeten meclis-i şer‘-i hatîr-i lâzımü’t-tevkīrde işbu bâ‘isü’l-kitâb Veli Bey b. Hasan nâm kimesne mahzarında her biri ikrâr ve takrîr-i kelâm edip müteveffâ-yı mezbûrun düyûn-ı kesîre-i müsbetesi olup mahalle-i mezbûrede vâki‘ bir tarafı Hasan Çelebi b. Mustafa mülkü ve bir tarafı Cafer Çavuş mülkü ve bir tarafı Dergâh-ı âlî yeniçerilerine mahsûs Atmeydanı ve bir tarafı tarîk-i âma müntehî muhterik menzil arsasından gayrı nukūd ve menkūl ve esâs-ı beyt ve evân-ı nühâsiyye ve gayr-ı nühâsiyye ve bi’l-cümle ism-i mal ıtlâk olunur terekesi olmamağla, düyûn-ı mesfûre için arsa-i mezkûrenin bey‘i lâzım gelmeğin kirâren ve mirâren mecâlis-i tâlibîne ve mehâfil-i râgıbîne arz-ı müzâyede olundukda rağabât-ı nâs inkıtâ‘ıyla mezbûr Veli Bey üzerinde on beş bin akçede karâr edip tâlib-i âhar zuhûr etmeyip ve meblağ-ı mezkûr arsa-i mezbûrenin semen-i misli olduğu müte‘ayyin ve mütebeyyin olmağla arsa-i mezbûreyi bey‘a kıbel-i şer‘den me’zûn olduğumuz ecilden arsa-i mezbûreyi bi cümleti’t-tevâbi‘ merkūm Veli Bey’e asâleten ve vesâyeten zarûret-i düyûn-ı mevkūfe için on beş bin akçeye bey‘-i bâtt-ı sahîh-i şer‘î ile bey‘ ve teslîm ol dahi minvâl-i muharrer üzre iştirâ ve kabûl ve kabz ve tesellüm eyledikden sonra semeni olan meblağ-ı mezbûr on beş bin akçeyi asâleten ve vesâyeten mezbûr Veli Bey yedinden tamâmen ahz u kabz eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fî târihi’l-mezbûr. Şuhûdü’l-hâl: Şaban Beşe b. Abdullah, Hasan b. Osman, İbrahim b. Osman, Hasan b. Hüseyin, Mehmed b. Muslu, Hüseyin b. Ahmed, Derviş b. Mehmed.