İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 743 Hüküm no: 1003 Orijinal metin no: [99a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Bey b. el-Hâc Ömer Efendi’nin Zımara köyü ahalisinde olan alacağını aldığı Eyâlet-i Anadolu’da kasaba-i Eğin sâkinlerinden İbrahim Bey b. el-Hâc Ömer Efendi meclis-i şer‘-i hatîr-i lâzımü’t-tevkīrde Divriği kazâsı müzâfâtından Zımara nâm karye ahâlîsinden Pigel v. Kirkor ve Kirkor v. Bâli ve Kirkor v. Arslan nâm Ermeniler mahzarlarında ikrâr ve takrîr-i kelâm edip karye-i mezbûre ahâlîsi zimmetlerinde deyn-i şer‘îden olan iki bin dokuz yüz riyâlî guruş hakkımı yedlerinden bi’t-tamâm alıp kabz edip meblağ-ı merkūm iki bin dokuz yüz guruşa müte‘allika da‘vâdan ve târih-i kitâba gelince beynimizde vâkı‘a ahz u i‘tâ ve mu‘âmelât-ı şettâya müte‘allika da‘vâdan mezbûrları ibrâ-i âmm-ı kātı‘ü’n-nizâ‘la ibrâ eyledim ba‘de’l-yevm eğer benden ve eğer vekîlimden husûs-ı mezbûra müte‘allika da‘vâ sudûr ederse lede’l-hükkâmi’l-kirâm mesmû‘a olmaya dedikde gıbbe’t-tasdîki’l-mu‘teber mezbûrlar dahi târih-i kitâba gelince cemî‘ de‘âvî ve mütâlebâtdan merkūm İbrahim Bey’i ibrâ eyledik dediklerinde, mâ vaka‘a bi’t-taleb ketb olundu. Fi’l-yevmi’s-sânî aşer min şehri Rebî‘ilâhir li sene erba‘a ve seb‘în ve elf. Şuhûdü’l-hâl: Mustafa Ağa Kethüdâ-yı Fâtıma Sultan, Sâlih Efendi b. Mustafa Çelebi, Ahmed Çelebi b. Abdullah, Hasan Beşe b. Ahmed, Osman Çelebi b. Ali, Ömer Beşe b. Demirci ve gayruhüm.