İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 743 Hüküm no: 1004 Orijinal metin no: [99a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Mustafa b. Ali’nin evini Bayram Efendi b. eş-Şeyh Receb’e sattığı Mahmiye-i İstanbul’da Harâccı Muhyiddin mahallesinde sâkin el-Hâc Mustafa b. Ali meclis-i şer‘-i hatîr-i lâzımü’t-tevkīrde işbu bâ‘isü’l-kitâb mefharü kuzâti’l-İslâm zübdetü vülâti’l-enâm Bayram Efendi b. eş-Şeyh Receb mahzarında ikrâr ve takrîr-i kelâm edip merhûme Kerime Hâtun vakfına arsasının senede altı yüz akçe mukāta‘a-i kadîmesi olup binâsı mülküm olan mahalle-i mezbûrede vâki‘ bir tarafı a‘lemü’l-ulemâ’i’l-muhakkikīn efdalü’l-fuzalâ’i’l-müdakkikīn ma‘denü’l-fazl ve’l-yakīn Şaban Efendi hazretleri tasarruflarında olan ekmekçi değirmeni ve bir tarafı Hasan Beşe tasarrufunda olan menzile ve iki tarafı tarîk-i âma müntehî hâriciyyede bir bâb fevkānî oda ve bir bâb tahtânî oda ve kenîf ve dâhiliyyede iki bâb fevkānî oda ve bir sofa ve dehliz ve kenîf ve tahtânî iki bâb oda ve bir su kuyusu ve bir kenîf ve cüneyneyi müştemil olan menzili bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık seksen beş bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi iştirâ ve kabûl ve kabz ve tesellüm eyledikden sonra semeni olan meblağ-ı mezbûr seksen beş bin akçeyi müşterî-i mezbûr Bayram Efendi yedinden tamâmen ahz u kabz eyledim ba‘de’l-yevm menzil-i mahdûd-ı mezbûr merkūm Bayram Efendi’nin mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer [min] şehri Rebî‘ilâhir li sene erba‘a ve seb‘în ve elf. Şuhûdü’l-hâl: Ahmed Efendi b. Ramazan el-İmâm, Ahmed Efendi b. İbrahim el-Müezzin, Mehmed Efendi b. Mustafa el-kadı, Süleyman Ağa b. Mehmed el-Cündî Mehmed Ağa b. Mustafa er-Râcil, el-Hâc Ahmed Ağa el-Hammâmî, Ahmed Beşe b. Kurt, Hasan Beşe b. Sinan, Mehmed b. Hüseyin Dellâl, İbrahim Beşe er-Râcil, Mustafa b. Ramazan ve gayruhüm.