İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 749 Hüküm no: 1011 Orijinal metin no: [100b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul’daki iplikçi esnafının kazzaz esnafına yamak oldukları, boyacı esnafıyla alakalarının olmadığı Mahmiye-i İstanbul’da iplikçi tâifesinin kethüdâları Şaban Bey b. Resûl ve yiğidbaşıları Hasan b. Abdullah ve Ali b. Seyyid Bâli ve Mehmed b. Mahmud ve el-Hâc Mustafa b. Ahmed ve Mustafa b. Pîrî Hoca ve Hasan Beşe b. Ahmed ve Muslu b. Yunus ve Abdi b. İbrahim nâm kimesneler meclis-i şer‘-i hatîrde mahmiye-i mezbûrda boyacı tâifesinin kethüdâları Mustafa b. Veli ve yiğidbaşıları Nikola v. Yorgi ve ihtiyârlarından Varkir v. Yorgi ve Yani v. Pirnod ve Zaharya v. Yorgi ve Ansas v. Aleksi mahzarlarında takrîr-i da‘vâ edip feth-i hâkānîden berî bizim tâifemiz işbu hâzırûn bi’l-meclis kazzâz tâifesinin kethüdâları Ahmed Çelebi b. Abdülbâkī ve yiğidbaşıları Receb b. Sefer ve ihtiyârlarından es-Seyyid Mahmud Çelebi b. es-Seyyid Hüseyin ve Ahmed Çelebi b. Pîrî ve el-Hâc Mustafa b. Mahmud’a yamak olup taraf-ı saltanat-ı aliyyeden örü ve sâir tekâlîf-i şâkka tarh olundukda kazzâz tâifesiyle ma‘an veregelip kadîmden metâ‘ımız olan ipliği kendimiz boyaya gelip bir vechile boyacı tâifesiyle alâkamız yok iken sizler metâ‘ınız olan ipliği boyamağla bizim san‘atımız ahâlîsinden olursuz, ol vechile bize yamaksız deyû bizi her bâr rencîdeden hâli değillerdir, suâl olunup men‘ ve def‘ olunmak matlûbumuzdur dediklerinde, gıbbe’s-suâl mezbûrun boyacı tâifesi Mustafa ve Nikola ve Varkir ve Yanaki ve Zaharya ve Ansas cevâblarında fi’l-vâki‘ mezbûrun iplikçi tâifesi feth-i hâkānîden berî kazzâz tâifesine yamak olup kendi metâ‘ları olan ipliği kendiler boyaya gelip bizim anlarda vechen mine’l-vücûh alâkamız yoktur deyû her biri mu‘terif olmağın alâ mûcebi i‘tirâfihim ba‘de’l-yevm rencîde etmemek üzre mezkûrûna tenbîh birle mâ hüve’l-vâki‘ bi’t-taleb ketb olundu. Hurrire fi’l-yevmi’l-âşir [min] şehri Rebî‘ilâhir sene 1074. Şuhûdü’l-hâl: Hacı Ahmed b. Mahmud, Abdi Çelebi b. Hüseyin, Şükrullah b. Mustafa, Mustafa Çelebi b. İsâ ve gayruhüm.