İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 755 Hüküm no: 1020 Orijinal metin no: [102a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi’nin kullandığı odanın Ayşe’nin eski eşi Hasan b. Oruc’un olduğu Mahmiye-i İstanbul’da İshak Paşa mahallesinde sâkine iken bundan akdem vefât eden Ayşe bt. Hasan nâm hâtunun zevc-i metrûkü işbu râfi‘ü’l-kitâb Hasan b. Oruc nâm kimesne mahfil-i kazâda, müteveffât-ı mezbûrenin sadrî kebîr oğlu Mustafa Çelebi b. Mehmed mahzarında üzerine takrîr-i da‘vâ edip mahmiye-i İstanbul’da Ayasofya-i kebîr kurbunda vâki‘ Cebehâne-i âmire ocakları evkāfından bir bâb tahtânî ve iki bâb fevkānî odayı hâvî bir bâb oda icâre-i mu‘accele-i ma‘lûme ve ayda altmış akçe ücret-i müeccele ile ale’l-iştirâki’s-seviy müteveffât-ı mezbûre Ayşe Hâtun ile hayâtında mutasarrıflar iken benim ile hüsn-i zindegânî edersen senin olsun deyû izn-i mütevellî ile zikr olunan odada hissem olan nısf-ı şâyi‘ini zevcem müteveffât-ı mezbûre Ayşe’ye meccânen fâriğ ve mütevellîden temessük alıverip mezbûre Ayşe dahi şart-ı mezkûr ile ferâğ mu‘teber olmadığına yedimde fetevâ-yı şerîfe olduğu ecilden hisse-i meşrûhadan kasr-ı yed ve bana teslîme mezbûr Mustafa Çelebi’ye tenbîh olunmak matlûbumdur deyû hâlâ Şeyh-i meşâyihu’l-İslâm müfti-i âmme-i enâm olan sultânü’l-ulemâ’i’l-izâm burhânü’l-fuzalâ’i’l-fihâm izzetlü Yahya Efendi ünvânı ile mu‘anvene fetvâ-yı şerîfe ibrâz edip mazmûnu “Zeyd icâre-i mu‘accele ve müecceleli vakıf menzilini bunca benim ile hüsn-i zindegânî edersen senin olsun deyû izn-i mütevellîyle zevcesi Hind’e ferâğ edip Hind dahi şart-ı mezkûr ile kabûl eyledikden sonra Hind fevt oldukda, menzil-i mezbûru Hind’in evlâdı zabt eyleseler, hâlâ Zeyd şart-ı mezkûr ile ferâğ mu‘teber değildir deyû ol menzili Hind’in evlâdından olup zabta kādir olur mu, deyû istif[tâ] olundukda cevâb-ı bâ savâblarında olur” deyû buyurulmağın, gıbbe’s-suâl mezkûr Mustafa Çelebi cevâbında müdde‘î-i mezbûr zikr olunan odada hissesi olan nısf-ı şâyi‘ini şart-ı mezkûr ile vâlidesi mezbûre Ayşe’ye fâriğ olup ol dahi şart-ı mezbûr ile kabûl eylediğin tav‘an mu‘terif olmağın ber mûceb-i fetevâ-yı şerîfe zikr olunan odanın nısf-ı şâyi‘inden kasr-ı yed edip müdde‘î-i mezbûra teslîme mezbûr Mustafa Çelebi’ye tenbîh olunup mâ vaka‘a bi’t-taleb ketb olundu. Hurrire fî târihi’l-mezbûr li’s-seneti’l-merkūme. Şuhûdü’l-hâl: El-Hâc Ahmed b. Mahmud, Abdülkerim Ağa b. Sefer, Şükrullah Bey b. Mustafa, Abdurrahman b. Hasan ve gayruhüm.