İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 757 Hüküm no: 1022 Orijinal metin no: [102a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. İbrahim’in Ahî Çelebi vakfına ait dükkandaki hissesini İstaşnoz v. Manol’e kiraladığı Mahmiye-i İstanbul’da Mirahor mahallesinde sâkin Mustafa b. el-Hâc İbrahim nâm sagīrin tesviye-i umûruna kıbel-i şer‘den mansûb vasîsi olan fahrü’l-akrân Abdullah Çelebi b. Ahmed meclis-i şer‘-i hatîrde bakkal tâifesinden işbu bâ‘isü’s-sifr İstaşnoz v. Manol nâm zimmî muvâcehesinde ikrâr ve takrîr-i kelâm edip vasîsi olduğum sagīr-i mersûmun mahmiye-i mezbûre hısnı ebvâbından Ayazmakapısı hâricinde vâki‘ merhûm Ahî Çelebi vakfından olup icâre-i mu‘accele ve müeccele-i ma‘lûmeteyn ile mezbûr İstaşnoz ve sagīr-i mezbûrun ale’l-iştirâki’s-seviy tasarruflarında olan bakkal dükkânının nısf hisse-i şâyi‘asını mukaddemâ işbu hâzır bi’l-meclis Panayot v. Todori nâm zimmîye on yedişer akçe ücretle bi’l-vesâye îcâr ve teslîm edip ba‘dehû rızâmız ile fesh-i akd-i icâre eylediğimizden sonra hâlâ hisse-i meşrûham vesâyetim hasebiyle mesfûr İstaşnoz’a beher şehr altışar yüz akçe ücret ile îcâr ve teslîm ol dahi vech-i muharrer üzre istîcâr ve kabûl eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlisi aşer şehri Rebî‘ilâhir li sene erba‘a ve seb‘în ve elf. Şuhûdü’l-hâl: Abdi Çelebi b. Mustafa Bezzâzistânî, el-Hâc Ali b. Abdullah bezzâsistânî, Sâlih Çelebi b. ( ) Bezzâzistânî, kuyumcu İbrahim Çelebi b. ( ), es-Seyyid Ali Çelebi b. ( ) ve gayruhüm.