İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 757 Hüküm no: 1023 Orijinal metin no: [102a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman Beşe b. Mehmed’e olan borcunu ödemesi için Halil Bey’e tenbihatta bulunulduğu Vilâyet-i Rumeli’nde Ziştovi nâm kasaba sâkinlerinden olup dergâh-ı âlî -dâme merci‘an li’l-e‘âlî- yeniçerilerinin otuz dokuzuncu ağa bölüğüne mahsûs oda ahâlîsinden işbu bâ‘isü’l-kitâb fahrü’l-akrân Süleyman Beşe b. Mehmed mahfil-i kazâda, Halil Bey b. Nasûh mahzarında üzerine da‘vâ ve takrîr-i kelâm edip târih-i kitâbdan üç ay mukaddem vilâyetimizin vâlisi olan Kadıoğlu İbrahim Paşa’nın mütesellimi Süleyman Ağa tarafından mübâşir olup beni ahz edip bi gayr-i vech-i şer‘î dört bin akçemi fuzûlen ahz u kabz eylemişdi. Suâl olunup meblağ-ı mezbûru bana red ve teslîme mezbûr Halil Bey’e tenbîh olunmak matlûbumdur dedikde gıbbe’s-suâl ve akībe’l-inkâr, müdde‘î-i mezkûrdan müdde‘âsını mübeyyin beyyine taleb olundukda udûl-i müslimînden olup yine kasaba-i mezbûre sükkânından Halil Bey b. İbrahim ve Ali Bey b. Selim nâm kimesneler li ecli’ş-şehâde meclis-i şer‘a hâzırân olup istişhâd olunduklarında, fi’l-hakīka târih-i mezbûrda mûmâ-ileyh Kadıoğlu İbrahim Paşa’nın mü[te]sellimi olan Süleyman Ağa tarafından mübâşeret ile gelip mezbûr Süleyman Beşe’yi ahz edip ba‘dehû vech-i şer‘î bizim huzûrumuzda dört bin akçeyi ahz u kabz eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebince makbûz dört bin akçeyi müdde‘î-i mezbûr Süleyman Beşe’ye edâya ve teslîme merkūm Halil Bey’e tenbîh birle mâ hüve’l-vâki‘ bi’t-taleb ketb olundu. Hurrire fî târihi’l-mezbûr li’s-seneti’l-merkūm. Şuhûdü’l-hâl: Ramazan Çelebi b. Osman?, Ramazan Çelebi b. Ali, Mehmed b. Abdullah.