İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 762 Hüküm no: 1029 Orijinal metin no: [103a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bakkal Todoş v. Kiryaki’nin Yorgi Makri’deki alacağını bu işe görevli Hıristo’dan aldığı Medîne-i Üsküdar’da bakkal tâifesinden Todoş v. Kiryaki nâm zimmî meclis-i şer‘-i hatîr lâzımü’t-tevkīrde yoğurtçu tâifesinden Hıristo v. İstirati nâm zimmî muvâcehesinde ikrâr ve takrîr-i kelâm edip bundan akdem gāib ani’l-meclis Yorgi [v.] Makri zimmetinde her biri yüz yirmişer akçeye olmak üzre yedimden müşterâ ve makbûz yüz re’s koyun bahâsından on iki bin akçe hakkım olmağla meblağ-ı mezbûr on bin akçeyi bana edâ ve teslîme Hıristo’ya emr etmişdi hâlâ meblağ-ı mezbûru, me’mûr-ı mezkûr Hıristo yedinden tamâmen ahz u kabz eyledim ba‘de’l-yevm zikr olunan yüz re’s koyun semeninden bir akçe ve bir habbe hakkım bâkī kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdisi aşer fî şehri Rebî‘ilâhir li sene erba‘a ve seb‘în ve elf. Şuhûdü’l-hâl: El-Hâc Ahmed b. Mahmud, Abdi Çelebi b. Hasan, Osman Çelebi b. Abdullah, Baba Resûl b. Rıdvan ve gayruhüm.