İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 762 Hüküm no: 1028 Orijinal metin no: [103a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Turabi’nin mirasçılarından kızı Hacer’in mirasdaki hissesini vasîden aldığı Medîne-i Ebâ Eyyûb el-Ensârî mahallâtından Çavuş Kasım mahallesinde sâkine iken bundan akdem vefât eden Mehmed Ağa b. Turâbî’nin verâseti, sulbî kebîr oğlu Ali Çelebi ve sulbiye kebîre kızı Hacer’e münhasıra olduğu şer‘an mütehakkik oldukdan sonra mezbûre Hacer meclis-i şer‘-i hatîrde müteveffâ-yı mezbûrun vasiyy-i muhtârı olmağla tereke-i müteveffâ-yı mezkûra vâzı‘u’l-yed olan râfi‘ü’l-kitâb Mehmed Çelebi b. Yusuf mahzarında bi’l-verâse ikrâr ve i‘tirâf edip cümle-i tereke-i müteveffâ-yı mezkûrûna bi hasebi’l-irsi’ş-şer‘î bana isâbet eder hisse-i şer‘iyyemi defter-i kassâm nâtık olduğu üzre bi’t-tamâm ve’l-kemâl vasiyy-i mezbûr Mehmed Çelebi yedinden alıp kabz edip min ba‘d hisse-i mevrûsemden yedinde bir akçe ve bir habbe bâkī kalmadı dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’r-râbi‘ aşer min Rebî‘ilâhir li sene erba‘a ve seb‘în ve elf. Şuhûd[ü’l-hâl]: Es-Sâbikūn.