İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 768 Hüküm no: 1039 Orijinal metin no: [104b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Abdullah’ın kızı Fâtıma’ya borç verdiği paranın diğer mirasçıları tarafından kendisinden alınıp aralarında bir dava kalmadığı Havâss-ı Aliyye müzâfâtından kasaba-i Silivri’de sâkin iken bundan akdem vefât eden Mustafa b. Abdullah nâm kimesnenin verâseti sulbî kebîr oğlu Osman’a ve sulbiye kebîre kızı Ayşe’ye münhasıra olduğu şer‘an zâhir ve müte‘ayyin oldukdan sonra mezbûrân Osman ve Ayşe meclis-i şer‘-i hatîr-i lâzımü’t-tevkīrde mahmiye-i İstanbul’da el-Hâc Ahmed mahallesinde sâkine işbu bâ‘isetü’l-vesîka Fâtıma bt. Mehmed nâm hâtun mahzarında her biri ikrâr ve takrîr-i kelâm edip babam mezkûr Mustafa hâl-i hayâtında mezbûre Fâtıma Hâtun’a cihet-i karz-ı şer‘îden yirmi bin hurda akçe ve otuz yaldız altınını ikrâz ve teslîm ol dahi iktirâz ve kabz eyledikden sonra kable’l-ahz mûrisimiz vefât etmekle meblağ-ı mezbûr irsen ikimize intikāl etmeğin biz dahi meblağ-ı mezbûru verâsetimiz hasebiyle merkūme Fâtıma’dan da‘vâ eylediğimizde, ol dahi inkâr etmekle biz dahi huzûr-ı hâkimü’ş-şer‘de mezbûre Fâtıma muvâcehesinde şuhûd-ı udûlle isbât ve yedimize mûcebince hüccet-i şer‘iyye almış idik hâlâ meblağ-ı mezbûrdan yirmi üç bin akçesin mersûme Fâtıma yedinden ahz u kabz edip bâkī kalan altı bin üç yüz yetmiş beş akçe da‘vâsından merkūme Fâtıma’nın zimmetini ibrâ-i âmm-ı kâti‘u’n-nizâ‘la ibrâ ve iskāt eyledik dediklerinde, gıbbe’t-tasdîk mezbûre Fâtıma Hâtun mezbûrân Osman ve Ayşe vâlideleri Rahime bt. Ali nâm hâtun min ba‘d husûs-ı mezbûra ve gayrıya müte‘allika da‘vâm ve nizâ‘ım yoktur dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî aşer fî Rebî‘ilâhir li sene erba‘a ve seb‘în ve elf. Şuhûdü’l-hâl: Es-Seyyid Murtaza b. Osman, es-Seyyid İsmail b. Davud, Musa b. Mehmed, Mehmed Beşe b. Ahmed ve gayruhüm.