İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 767 Hüküm no: 1038 Orijinal metin no: [104a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Ağa b. Ebubekir’in çiftlik ve tarlalarını Halil Ağa’ya satıp parasını aldığı Dârü’l-hilâfeti’l-aliyye Kostantıniyye el-mahmiyye’de Nahılbend mahallesi sâkinlerinden fahrü’l-emâsil ve’l-eşbâh Hasan Ağa b. Ebûbekir Efendi meclis-i şer‘-i hatîr lâzımü’t-tevkīrde hâliyâ hâs ahır halîfesi olan umdetü’l-a‘yân mefharü’l-akrân Halil Ağa b. Hamza tarafından ikrâr-ı âti’z-zikri tasdîke vekîl olup alâ mâ hüve nehcü’s-sübût vekâleti sâbite olan Hacı Şaban b. Hacı Hızır mahzarında ikrâr ve takrîr-i kelâm edip silk-i mülk-i sahîhimde münselik olup vilâyet-i Anadolu’da medîne-i Alaşehir kurbunda vâki‘ bir tarafdan Mendokora Suyu ve bir tarafdan Mudunya çayı ve bir tarafdan piyâde yeri ve bir tarafdan tarîk-i âm ile mahdûd ve dört bâb tahtânî oda ve iki ahırı müştemil Kadıoğlu Çiftliği demekle ma‘rûf mülk menzili beynimizde ilm-i şer‘î ile aded ve ecnâsı ma‘lûme devvâb ve mevâşî ve urûz ve âlât-ı zirâ‘at ve samanlıklar ve anbarlar ve sâir tevâbi‘ ve levâhıkı ve cemî‘ menâfi‘ ve merâfıkı ile müşârün-ileyh Halil Ağa hazretlerine nakid ve râyic fi’l-vakt yüz yirmi beş bin akçeye li safkatin vâhidetin bey‘-i bâtt-ı sahîh-i şer‘î ile bey‘ edip ol dahi iştirâ ve kabûl eyledikden sonra yine medîne-i mezbûre kurbunda çiftlik-i merkūma tâbi‘ lede’l-ahâlî ve’l-cîrân ma‘lûmü’l-hudûd ve’l-mikdâr tarlaların dahi hakk-ı tasarrufların sâhib-i arz olanların ma‘rifetleri ile altmış bin akçe bedel mukābelesinde mûmâ-ileyh Halil Ağa hazretlerine ferâğ ve tefvîz edip ol dahi tefevvüz ve kabûl eyledikden sonra semen-i mezbûr yüz yirmi bin akçe ile bedel-i tefvîz altmış bin akçe ki cem‘an yüz seksen beş bin akçe eder müşârün-ileyh Halil Ağa hazretleri yedlerinden bi’t-tamâm alıp kabz eyleyip mârrü’z-zikr çiftlik ve ana tâbi‘ olan sâlifü’z-zikr tarlaları mahallerinde zabt ve tasarrufa mûmâ-ileyh Halil Ağa hazretlerini taslît eyledim ba‘de’l-yevm çiftlik-i mezbûr mülk-i müşterâsı ve merkūm tarlalar hakk-ı müfevvazları olmuşdur keyfe mâ yeşâ’ ve yahtâr mutasarrıf olsun dedikde vekîl-i merkūm Hacı Şaban mezbûr Hasan Ağa’yı cemî‘ kelimâtında vicâhen tasdîk ve şifâhen tahkīk etmeğin mâ vaka‘a bi’t-taleb ketb olundu. Hurrire fi’l-yevmi’s-sâbi‘ aşer min Rebî‘ilâhir li sene erba‘a ve seb‘în ve elf. Şuhûdü’l-hâl: Atâullah Çelebi b. ( ), Hüseyin Bey b. İsmail, mefharü’l-a‘yân Mehmed Efendi b. Bayezid, Umdetü’l-emâcid ve’l-ekârim İshak Efendi b. Şeyh Mehmed Efendi mîralem-i sâbık, Mahmud Ağa b. Cafer, Şahbaz bostânî, Fahrü’l-eşbâh Hasan Ağa kethüdâ-i Kuleli ve gayruhüm.