İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 769 Hüküm no: 1041 Orijinal metin no: [104b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail b. Mehmed’in boş arsasını Mehmed Bey’e sattığı Dârü’s-saltanati’s-seniyye mahmiye-i Kostantıniyye -sânehallâhü ani’l-beliyye- mahallâtından Oruc Gāzi mahallesinde sâkin İsmail b. Mehmed nâm kimesne meclis-i şer‘-i şerîf-i şâmihu’l-beyânda, işbu hâfizu’l-kitâb fahrü’l-akrân Mehmed Bey b. Ahmed el-cündî mahzarında ikrâr ve takrîr-i kelâm edip silk-i mülkümde münselik olup mahalle-i mezkûrede vâki‘ bir taraf[ı] Fâtıma Hâtun mülkü ve bir tarafı Hayrünnisâ Hâtun vakfı ve iki tarafı tarîk-i âm ile mahdûd ve mümtâz olan arsa-i hâliyemi mersûm Mehmed Bey üç yüz otuz beş esedî guruşa bey‘-i bâtt-ı sahîh-i şer‘î ile bey‘ edip ol dahi iştirâ ve kabûl ve tesellüm eyledikden sonra zikr olunan meblağ-ı mezbûr üç yüz otuz beş esedî guruşa merkūm Mehmed Bey yedinden bi’t-tamâm ve’l-kemâl alıp kabz eyledim ba‘de’l-yevm arsa-i mezkûre mezbûr Mehmed Bey’in mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ aşer [min] şehri Rebî‘ilâhir li sene erba‘a ve seb‘în ve elf. Şuhûdü’l-hâl: Mehmed Efendi b. el-Hâc Abdullah el-Müezzin, Mustafa Efendi b. Mehmed, Mehmed Bey b. Osman, Sâdık Bey b. Mehmed ve gayruhüm.