İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 769 Hüküm no: 1042 Orijinal metin no: [104b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şaban Beşe b. Kasım’ın evini Frenk ve İskender’e müştereken sattığı Mahmiye-i İstanbul’da Debbâğ Yunus mahallesi sükkânından Şaban Beşe b. Kasım meclis-i şer‘-i hatîr-i lâzımü’t-tevkīrde Unkapanı hâricinde çizmeci tâifesinden işbu hâfızü’l-kitâb Firenk ve İskender veledey Dadur nâm Ermeniler mahzarlarında ikrâr ve takrîr-i kelâm edip silk-i mülk-i sahîhimde münselik olup Tahtaminâre mahallesinde vâki‘ bir tarafdan Çakırcı Halil mülkü ve bir tarafdan merkūm Mehmed Paşa vakfı olup Matyoz nâm zimmî tasarrufunda olan menzil ve iki tarafdan tarîk-i âma müntehî fevkānî iki oda ve bir sofa ve dehliz ve tahtânî bir ahır ve kenîf ve su kuyusu ve bir mikdâr arz-ı hâliyeyi müştemil mülk menzilimi, bi cümleti’t-tevâbi‘ ve’l-levâhık mezbûrân Firenk ve İskender’e kırk altı bin nakid râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm anlar dahi vech-i muharrer üzre ale’l-iştirâki’s-seviy iştirâ ve kabûl ve kabz ve tesellüm eylediklerinde semeni olan meblağ-ı merkūm kırk altı bin akçeyi mezbûrân Firenk ve İskender yedlerinden tamânen ahz u kabz eyledim ba‘de’l-yevm menzil-i mahdûd-ı mezkûr mezbûrân Frenk ve İskender’in mülk-i müşterâsıdır, keyfe mâ yeşâ’ân ve yahtârân mutasarrıflar olsunlar dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fi’l-yevmi’s-sâbi‘ aşer [min] şehri Rebî‘ilâhir sene 1074. Şuhûdü’l-hâl: Kadri Efendi el-Müezzin, Mehmed b. Kayyım Çelebi, Halil b. Çakırcı, Bayram b. ( ) attâr, Mustafa b. Zülfikār ve gayruhüm.