İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 787 Hüküm no: 1067 Orijinal metin no: [108b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bayram v. Avraham ve karındaşlarınin Ayasofya-i Kebir vakfına ait ve tasarruflarında bulunan boş arazi ve arsayı Mustafa Ağa b. Hüseyin’e sattıkları Mahmiye-i İstanbul’da Tahtaminâre mahallesi sükkânından Çana cemâ‘atinden Bayram v. Avraham nâm yahudi ve kız karındaşları Ester ve Pola ve Rıfka nâm yahudiler meclis-i şer‘-i hatîrde Ayasofya-i kebîr mahallesinde sâkin umdetü’l-a‘yân Mustafa Ağa b. Hüseyin mahzarında her biri ikrâr ve i‘tirâf edip Ayasofya-i kebîr evkāfından olup icâre-i mu‘accele-i ma‘lûme ve beher sene otuz altı akçe ücret-i müeccele ile taht-ı tasarrufumda olup mahmiye-i İstanbul hısnı ebvâbından Balat ve Fener kapıları hâricinde vâki‘ bir tarafdan tekye-i mezbûre hısnı ve bir tarafı İsrail nâm yahudi tasarrufunda menzil ve bir tarafı ( ) nâm zimmî tasarrufunda olan arz-ı hâliye ve bir tarafı tarîk-i âma müntehî ayazma ta‘bîr olunur mâ’-i câriyeyi müştemil arsa-i hâliyemi, ma‘rifet-i mütevellî-i vakf-ı mezbûr ile on altı bin nakid râyic fi’l-vakt akçe bedel mukābelesinde mezbûr Mustafa Ağa’ya ferâğ ve tefvîz ve teslîm ol dahi tefevvüz ve kabûl ve kabz eyledikden sonra bedel-i mezbûr on altı bin akçeyi mezbûr Mustafa Ağa yedinden tamâmen ahz u kabz eyledik dediklerinde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Rebî‘ilâhir li sene erba‘a ve seb‘în ve elf. Şuhûdü’l-hâl: Seyfullah Çelebi b. Avni, Sunullah Çelebi b. Avni, Mehmed Bey b. ( ), Ali Çelebi b. ( ), Ömer Bey b. Mustafa ve gayruhüm.