İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 786 Hüküm no: 1066 Orijinal metin no: [108b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kanber’in Tahtaminâre mahallesinden Asadur v. Reken’in yumrukla ön dişini kırdığının sabit olduğu Mahmiye-i İstanbul’da Balat kurbunda Tahtaminâre mahallesinde sâkin işbu hâmilü’s-sifr Asadur v. Reks nâm Ermeni muvâcehesinde üzerine takrîr-i da‘vâ edip mezbûr Kanber dünkü gün vakt-i zuhrda Eski Nişancı kurbunda bi gayri hakkın yüzüme amden yumruk ile darb edip ol darbın şiddetinden nâşî üst ön dişim çıkmışdır hâlâ nazar olundukdan sonra mûcibi icrâ olunmak matlûbumdur dedikde nazar olundukda fi’l-vâki‘ müdde‘î-i mezbûrun bir üst ön dişi olmadığı müşâhede olundukdan sonra gıbbe’s-suâl ve akībe’l-inkâr müdde‘î-i mezbûrdan müdde‘âsına mübeyyine beyyine taleb olundukda Kesir v. Melkon ve Kirkor v. Reks ve David v. Mıgır nâm Ermeniler meclis-i mezbûrda li ecli’ş-şehâde hâzırûn olup isre’l-istişhâd fi’l-vâki‘ dünkü gün vakt-i zuhrda Eski Nişancı kurbunda bi gayri hakkın müdde‘î-i mezbûrun yüzüne amden yumruk ile bizim huzûrumuzda darb edip ol darbın şiddetinden müdde‘î-i mezbûr Asadur’un bir ön üst dişi çıkdı, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn [min] şehri Rebî‘ilâhir li sene erba‘a ve seb‘în ve elf. Şuhûdü’l-hâl: Mehmed b. Hasan, Ali b. Hasan, Ebûbekir b. Bâli, Mehmed b. Mustafa ve gayruhüm.