İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 788 Hüküm no: 1069 Orijinal metin no: [108b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Ali’ye borcunu inkâr eden Foti’nin kefili Yani’ye bunu ispat için süre verildiği Mahmiye-i İstanbul’da Balatkapısı dâhilinde Tahtaminâre mahallesinde sâkin işbu râfi‘ü’l-kitâb el-Hâc Mustafa b. Ali dîvân-ı kāimmakām-ı sadr-ı a‘zamîde ma‘kūd olan mahfil-i kazâda, Yani v. Dimo nâm zimmî muvâcehesinde üzerine takrîr-i da‘vâ edip gāib ani’l-meclis Foti nâm zimmî zimmetinde cihet-i karz-ı şer‘îden on bir bin beş yüz fıddî râyic fi’l-vakt akçe hakkım olup meblağ-ı mezbûra emr ve kabûlü hâviye kefâletle mezbûr Yani kefîl bi’l-mâl oldukdan sonra meblağ-ı mezbûrun dört bin iki yüz akçesini bi hükmi’l-kefâle mezbûr Yani bana teslîm ben dahi ahz u kabz edip zimmetinde yedi bin üç yüz akçe bâkī kalmışdi hâlâ meblağ-ı bâkī-i mezbûru kefâleti hasebiyle mezbûr Yani’den taleb ederin, suâl olunsun dedikde gıbbe’s-suâl mezbûr Yani cevâbında kaziyye vech-i meşrûh üzre olup lâkin meblağ-ı bâkī-i mezbûr yedi bin üç yüz akçemi dahi müdde‘î-i mezkûra def‘ ve teslîm ol dahi ahz u kabz etmekle meblağ-ı bâkī-i mezbûr mütâlebesinden zimmetim berî olmuşdur deyû def‘le mukābele edicek gıbbe’l-istintâk ve’l-inkâr mezkûr Yani’den def‘-i mezbûrunu mübeyyine beyyine taleb olundukda ityân-ı beyyine için istimhâl etmeğin mehl-i şer‘î ile imhâl olunup mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn [min] şehri Rebî‘ilâhir li sene erba‘a ve seb‘în ve elf. Şuhûdü’l-hâl: Abdi Çelebi b. Hüseyin, Abdülkerim Ağa b. Bâli, Ali Ağa b. Hasan ve gayruhüm.