İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 796 Hüküm no: 1080 Orijinal metin no: [110b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rus asıllı Servinaz isimli cariyenin Mehmed b. Gülâbi’ye satıldığı Mahmiye-i İstanbul’da Karagöz mahallesi sâkinlerinden olup bundan akdem tarîk-i hâcda vefât eden Mehmed b. Ramazan’ın verâseti, zevce-i metrûkesi Râbia bt. Mustafa’ya ve vâlidesi Gülzâde bt. Abdullah’a ve sulbî sagīr oğlu Mustafa ile sulbiye sagīre kızı Fâtıma’ya münhasıra olduğu şer‘an zâhir ve müte‘ayyin oldukdan sonra sagīrân-ı mezbûrân Mustafa ve Fâtıma’nın tesviye-i umûrlarına kıbel-i şer‘den mansûbe vasiyyeleri olan Meryem bt. Abdullah nâm hâtun meclis-i şer‘-i şerîfde işbu râfi‘ü’l-kitâb es-Seyyid Mehmed b. Gülâbî mahzarında ikrâr ve takrîr-i kelâm edip müteveffâ-yı mezbûrun terekesinden sagīrân-ı mezbûrânın hisse-i şer‘iyyelerine isâbet eden açık kaşlı elâ gözlü orta boylu Rusiyyetü’l-asl Servinaz nâm câriye-i memlûkeleri bey‘ olunmak sagīrân-ı mezbûrâna enfa‘ olmağla kıbel-i şer‘den bey‘a me’zûn olduğum cihetden sûk-ı sultânîde müzâyede olunup rağabât-ı nâs münkatı‘a oldukdan sonra merkūm es-Seyyid Mehmed üzerinde on üç bin akçeye karâr edip ziyâde ile tâlib-i âhar olmamağın câriye-i mevsûf-ı mezbûre Servinaz’ı bi’l-vesâye mezbûr es-Seyyid Mehmed’e on üç bin nakid râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm. ol dahi iştirâ ve kabûl ve kabz ve tesellüm eyledikden [sonra] semeni olan meblağ-ı mezbûr on üç bin akçeyi merkūm es-Seyyid Mehmed yedinden tamâmen ahz ve kabûl eyledim dedikde gıbbe’t-tasdîki’ş-şer‘î mâ vaka‘a bi’t-taleb olundu. Fi’l-yevmi’s-sâmin ve’l-ışrîn min şehri Rebî‘ilâhir li sene erba‘a ve seb‘în ve elf. Şuhûdü’l-hâl: Abdülkerim Ağa sermuhzırân, Ahmed Çelebi b. Mahmud, Şükrullah b. ( ) Mustafa, Resûl b. Rıdvan ve gayruhüm.