İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 797 Hüküm no: 1081 Orijinal metin no: [110b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rus asıllı köle Ömer b. Abdullah’ın sahibi Hasan Bey tarafından azat edildiği İşbu bâ‘isü’l-kitâb açık kaşlı gök elâ gözlü orta boylu sarışın Moskoviyyü’l-asl Ömer b. Abdullah meclis-i şer‘-i hatîr-i lâzımü’t-tevkīrde mahmiye-i İstanbul’da Murad Paşa-yı Atîk mahallesi sâkinlerinden Hasan Bey b. Mustafa nâm kimesne mahzarında da‘vâ ve takrîr-i kelâm edip mezbûr Hasan Bey’in bundan akdem abd-i memlûkü olup mülkünde olduğum hâlde beni i‘tâk ve sâir ahrâr-ı asliyyîn zümresine ilhâk etmekle hür olmuş iken, yine bana rakīk olmak üzre vaz‘-ı yed eder suâl [olunup] kasr-ı yedine tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûr Ömer’den müdde‘âsını mübeyyine beyyine taleb olundukda udûl-i müslimînden sarrâc İbrahim Beşe b. Abdullah ve Haffâf Hasan Beşe b. Ahmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında, fi’l-hakīka bundan akdem mezbûr Hasan Bey’e Ömer’i satar mısın dediğimizde âzâd etmişdir [edilmişdir] deyû bizim huzûrumuzda ikrâr ve bizi işhâd etmiş idi. Ol vechile mezbûr Ömer sâir ahrâr-ı asliyyîn gibi hür olduğuna şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn [min] şehri Rebî‘ilâhir li sene erba‘a ve seb‘în ve elf. Şuhûdü’l-hâl: Ahmed Beşe b. Mehmed, Ali Beşe b. Abdi, Ahmed Çelebi b. Hasan, Mehmed Çelebi b. el-Hâc Ali, Ahmed Çelebi b. Mahmud, Abdi Çelebi b. Hasan.