İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 812 Hüküm no: 1104 Orijinal metin no: [113b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. Seydî Sâlih’in vakf ettiği odanın vakıf evladı kalmadığından Abdullah b. Ahmed’e verildiği Mahmiye-i İstanbul’da merhûm ve mağfûrun-leh Şeyh Ebülvefâ hazretleri mahallesinde vâki‘ merhûm Ahmed Çelebi b. Seydî Sâlih nâm sâhibü’l-hayr vakf ve süknâsını kendiden sonra vâlidesi Fâtıma bt. Ahmed’e, ba‘dehâ evlâdına ve evlâd-ı evlâdına ve evlâd-ı evlâd-ı evlâdına ba‘de’l-inkırâz bir recül-i sâliha şart ve ta‘yîn eylediği vâkıfına intimâyile tahdîd ve tavsîfden müstağnî bir bâb odayı evlâd-ı vâkıf-ı mezbûrdan Solak Mahmud Çelebi b. Hasan [nâm] kimesne ber mûceb-i şart-ı vâkıf mutasarrıf iken vefât edip evlâd-ı vâkıf-ı mezbûr bi’l-külliye münkariz olduğu ecilden zikr olunan oda mahlûl olmağın sulehâdan olup meskene eşedd-i ihtiyâc ile muhtâc olan işbu râfi‘ü’l-kitâb Abdullah b. Ahmed nâm kimesne yine zikr olunan oda ber mûceb-i şart-ı vâkıf kıbel-i şer‘den tevcîh olunup tasarrufu için işbu vesîka-i enîka ketb ve yedine def‘ olundu. Fi’l-yevmi’r-râbi‘ min Cemâziyelevvel li sene erba‘a ve seb‘în ve elf. Şuhûdü’l-hâl: Umdetü’l-ulemâ’i’l-kirâm Mehmed Efendi, Mustafa b. Ömer, Abdülkerim b. Bâli, Mustafa Efendi b. Mehmed Efendi, Hacı Ahmed b. Mahmud ve gayruhüm.