İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 811 Hüküm no: 1103 Orijinal metin no: [113b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman b. Ali’nin vârisleri arasında miras davası kalmadığı Mahmiye-i İstanbul’da Akşemseddin mahallesinde sâkin iken bundan akdem vefât eden Osman b. Ali nâm kimesnenin verâseti, zevce-i metrûkesi Rahime bt. Abdullah nâm hâtun ile merkūm Osman’ın li ebeveyn ammisi evlâdı olan Ahmed ve Fâtıma ibney Musli’ye münhasıra olup asl-ı mes’eleleri dört sehimden olup sihâm-ı mezbûreden bir sehimi zevcesi mezbûre Rahime’ye ve iki sehimi merkūm Ahmed’e ve bir sehimi mezkûre Fâtıma’ya isâbet eylediği şer‘an zâhir ve müte‘ayyin oldukdan sonra mezbûrân Fâtıma ve Ahmed meclis-i şer‘-i hatîrde müteveffâ-yı merkūmun zevce-i metrûkesi ve terekesine vâzı‘atü’l-yed olan mezbûre Rahime tarafından tasdîk-i âti’l-beyâna vekîl olup vekâleti Mehmed Çelebi b. Ali ve Ali b. Mehmed nâm kimesneler şehâdetleri ile şer‘an vekâleti sâbite olan oğlu Mustafa b. Mehmed mahzarında her biri ikrâr ve takrîr-i kelâm edip müteveffâ-yı mezbûrun cemî‘ terekesinden bize isâbet ve intikāl edip müte‘ayyin olan on sekiz bin akçe hisse-i şer‘iyyemizi müvekkile-i merkūme Rahime Hâtun yedinden bi’t-tamâm ahz u kabz edip tereke-i müteveffâ-yı mezbûre müte‘allika cemî‘ de‘âvî ve mütâlebâtdan mersûme Rahime Hâtun’u ibrâ-i âmm-ı kātı‘ü’n-nizâ‘la ibrâ ve iskāt eyledik dediklerinde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis min Cemâziyelevvel sene 1074. Şuhûdü’l-hâl: Mehmed Odabaşı b. Abdullah, Hasan Çelebi b. Ömer, Hüseyin Çelebi b. Yahya, Hasan Beşe b. Abdullah, Mehmed Çelebi b. Ali, Abdi Çelebi b. Hüseyin ve gayruhüm.