İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 813 Hüküm no: 1106 Orijinal metin no: [113b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müteveffâ Osman b. Ali’nin bıraktığı evin mirasçılar tarafından eşi Rahime ve oğluna satıldığı Mahmiye-i İstanbul’da Akşemseddin mahallesinde sâkine iken bundan akdem vefât eden Osman b. Ali nâm kimesnenin verâseti, zevce-i metrûkesi Rahime bt. Abdullah nâm hâtun ile merkūm Osman’ın li ebeveyn ammetsi evlâdı Ahmed ve Fâtıma ibney Muslu’ya münhasıra olup asl-ı mes’eleleri dört sehimden olup sihâm-ı mezbûreden bir sehimi zevcesi merkūm Rahime’ye ve iki sehimi merkūm Ahmed’e ve bir sehimi mersûme Fâtıma’ya isâbet eylediği şer‘an zâhir ve müte‘ayyin oldukdan sonra mezbûrân Ahmed ve Fâtıma meclis-i şer‘-i hatîrde mezkûre Rahime tarafından ikrâr-ı âti’l-beyânı tasdîke vekîl olup vekâleti Mehmed Çelebi b. Ali ve Ali b. Mehmed nâm kimesneler şehâdetleri ile şer‘an sâbite olan oğlu Mustafa b. Mehmed mahzarında her biri ikrâr ve takrîr-i kelâm edip müteveffâ-yı mezbûrun metrûkâtında olup mahalle-i mezbûrede vâki‘ Mustafa Bey mülkü ve bir tarafı Çörekçi Mahmud mülkü ve bir tarafı tabîb Hüseyin Bey b. Yusuf mülkü ve bir tarafı tarîk-i hâs ile mahdûd bir bâb fevkānî ve iki bâb tahtânî odaları ve zât-ı eşcâr-ı müsmire ve gayr-ı müsmire [ve] cüneyneyi müştemil olan menzilde, bi hasebi’l-irsi’ş-şer‘î vech-i muharrer üzre bize isâbet eden üç sehim hisse-i irsiyye-i şâyi‘amdan her birimizin menzil-i mezbûrdan hisse-i mu‘ayyenesinde mikdâr-ı sülüsü müvekkile-i merkūme Rahime Hâtun ve sülüsânı oğlu merkūm Mustafa’ya dokuz bin akçeye bey‘-i bâtt-ı sahîh-i şer‘î ile bey‘ ve teslîm edip anlar dahi minvâl-i muharrer üzre iştirâ ve kabûl ve kabz eylediklerinden sonra semen-i mezbûr dokuz bin akçenin elli bin akçesin mersûm Mustafa yedinden ve üç bin akçesin müvekkile-i merkūme Rahime Hâtun yedinden bi’t-tamâm ve’l-kemâl ahz u kabz eyledik ba‘demâ menzil-i mezbûrdan hisse-i şer‘iyyemiz olan sihâm-ı selâse-i şâyi‘anın sülüsü müvekkile-i mezbûre Rahime Hâtun’un ve sülüseyn-i âharını Merkūm Mustafa’nın mülk-i müşterâlarıdır, vech-i muharrer üzre mutasarrıflar olsunlar dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis min Cemâziyelevvel li sene erba‘a ve seb‘în ve elf. Şuhûdü’l-hâl: Mehmed Odababaşı b. Abdullah, Hüseyin Çelebi b. Ömer, Hüseyin Çelebi b. Hüseyin, Hasan Beşe b. Abdullah, Mehmed Çelebi b. Ali, el-Hâc Ahmed b. Mahmud, Abdi Çelebi b. Hüseyin, Şükrullah b. Mustafa, Mehmed b. Ramazan ve gayruhüm.