İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 814 Hüküm no: 1107 Orijinal metin no: [113b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hadîka-i hâssa emeklilerinden Mustafa b. Ali’nin Rus asıllı kölesini azat ettiği Mahmiye-i İstanbul’da Karabaş mahallesi sükkânından olup Hadîka-i hâssa bostânîleri mütekā‘idlerinden Mustafa b. Ali tarafından husûs-ı âti’l-beyânı ikrâra vekîl, olup es-Seyyid Mehmed b. es-Seyyid Durak ve Mehmed b. Mustafa şehâdetleri ile şer‘an vekâleti sâbite olan Ali b. Mustafa meclis-i şer‘-i hatîr-i lâzımü’t-tevkīrde müvekkil-i mezbûra rıkkını mu‘terif olan orta boylu açık kaşlı gök elâ gözlü Rusiyyetü’l-asl bâ‘isü’l-kitâb Hüseyin b. Abdullah mahzarında ikrâr ve takrîr-i kelâm edip müvekkil-i mezbûrun işbu abd-i memlûkü olan merkūm Hüseyin’i hasbeten lillâhi te‘âlâ ve taleben li merzâti Rabbihi’l-a‘lâ tahrîr ve i‘tâk ve silk-i ahrâr-ı asliyyîne idrâc ve ilhâk eyledi ba‘de’l-yevm mezbûr Hüseyin sâir ahrâr-ı asliyyîn gibi hür olup üzerinde velâ-i şer‘îden gayrı hak ve alâkam kalmadı dedi dedikde mâ vaka‘a bi’t-taleb ketb olundu. Hurrire fî târihi’l-mezbûr. Şuhûdü’l-hâl: Abdullah Çelebi b. b. Ramazan, Receb b. Mehmed, Mustafa b. Veli, Mustafa Çelebi, Mehmed b. Ramazan er-Râcil, Ahmed Çelebi b. Mahmud ve gayruhüm.