İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 815 Hüküm no: 1109 Orijinal metin no: [114a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şazban bt. Mosi’nin Dimitri v. Todori’deki alacağına Yamandi’nin kefil olduğunu onayladığı Mahmiye-i İstanbul hısnı ebvâbından Ayakapısı kurbunda sâkine Şazban bt. Mosi nâm yahudiye tarafından husûs-ı âti’l-beyâna vekîl-i müsecceli olan Ohri cemâ‘atinden Aslan v. Şeban nâm yahudi mahfil-i kazâda, mahrûse-i Galata hâricinde vâki‘ Kuloğlu mahallesinde sâkin kuyumcu Yamandi v. Dimitri nâm zimmî muvâcehesinde üzerine bi’l-vekâle da‘vâ ve takrîr-i kelâm edip müvekkilem mezbûrenin gāib ani’l-meclis Dimitri v. Todori nâm zimmî zimmetinde cihet-i karz-ı şer‘îden yüz yirmi beş altın hakkı olup meblağ-ı merkūma, merkūm Yamandi tarafeynden emr ve kabûlü hâviye kefâlet-i sahîha-i şer‘iyye ile kefîl olmuşdu hâlâ vekâletim hasebiyle meblağ-ı mezbûr yüz yirmi beş altını kefîl-i mezbûr Yamandi’den taleb ederim suâl olunsun dedikde gıbbe’s-suâl merkūm Yamandi cevâbında kaziyye bâlâda tafsîli mürûr ettiği vech üzre[dir deyû] merkūm Dimitri zimmetinde olan meblağ-ı mezbûr yüz yirmi beş aded altına kefâletini ikrâr ve i‘tirâf etmeğin ikrârı mûcebince meblağ-ı mezbûr yüz yirmi beş altını vekîl-i mezbûr Aslan’a edâ ve teslîme merkūm Yamandi’nin ba‘de’t-tenbîh yine mahrûse-i Galata mahallâtından Karaköy mahallesinde sâkin Yani v. Baskali nâm zimmî mahfil-i mersûmda târih-i kitâbdan yetmiş gün tamâmına değin merkūm Yamandi’nin nefsine ve gaybet ederse zimmetine lâzım gelen meblağa tarafeynden emr ve kabûlü hâviye kefâlet-i sahîha-i şer‘iyye ile kefîl oldum dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevm hurrire fî târihi’l-mezbûr li’s-seneti’l-merkūme. Şuhûdü’l-hâl: Ali Çavuş b. Arslan el-Mübâşir, es-Seyyid Abdullah Efendi b. Mustafa, el-Hâc Sâlim b. Süleyman, Abdurrahman Çelebi b. Bâli, Mustafa b. Abdullah ve gayruhüm.