İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 814 Hüküm no: 1108 Orijinal metin no: [114a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma ve Ümmühânî Hâtunların yanmış evlerinin arsasını vakfa verip enkazdan dolayı olan alacaklarını aldıkları Mahmiye-i İstanbul’da Yenibahçe kurbunda Karabaş mahallesi sâkinelerinden Fâtıma ve Ümmühânî bintey Süleyman nâm hâtun taraflarından ikrâr-ı âti’l-beyâna vekîl olup mezbûretânın zâtlarını ma‘rifet-i şer‘iyye ile ârifân olan Ali Efendi el-Müderris ve Ahmed b. Ali şehâdetleri ile şer‘an vekâleti sâbite olan İsmihan bt. Ferhad nâm hâtun meclis-i şer‘-i şerîfde bâ‘isü’l-kitâb Mehmed b. Ali nâm kimesne mahzarında bi’l-vekâle ikrâr ve takrîr-i kelâm edip arsası merhûme Fâtıma Hâtun vakfından olup Murad Paşa-yı Atîk medresesine müderris olanlara beher şehr otuzar akçe mukāta‘ası olan mahmiye-i mezbûrede Aksaray kurbunda İsmail Ağa mahallesinde vâki‘ iki tarafı Fâtıma Hâtun mülkü ve bir tarafı Mehmed Bey mülkü ve bir tarafı tarîk-i âm ile mahdûd olup büyût-ı adîdeyi müştemil mülk menzil müvekkiletân-ı mezbûretânın ale’l-iştirâki’s-seviy mülkleri olup tasarruflarında iken bundan [akdem] vâki‘ olan harîk-i kebîrde muhterik olup arsa kalmışdi hâlâ arsa-i mezbûre üzerinde mevcûd olan enkāzını on beş bin akçeye mezkûr Mehmed’e bey‘-i bâtt-ı sahîh-i şer‘î ile bey‘ ve arsa-i mezbûremi vakf-ı mezbûr mütevellîsi ma‘rifetiyle mezkûr Mehmed’e meccânen ferâğ ve tefvîz ve her birini teslîm edip mezbûr Mehmed dahi enkāz-ı mezbûreyi iştirâ ve kabûl ve arsa-i mezbûreyi dahi tefevvüz ve kabûl ve her birini tesellüm ve kabz eyledikden sonra semeni olan meblağ-ı mezbûrân on beş bin akçeyi müşterî-i mezbûr Mehmed Bey yedinden tamânen ahz u kabz edip min ba‘d arsa-i mezbûre hakk-ı müfevvazı ve enkāz-ı mezkûre mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis min Cemâziyelevvel li sene erba‘a ve seb‘în ve elf. Şuhûdü’l-hâl: Ali Efendi el-Müderris, Mehmed Efendi b. Nurullah, Ali Bey b. Osman, Ahmed b. Ali, Sâdık Bey b. Mehmed ve gayruhüm.