İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 821 Hüküm no: 1120 Orijinal metin no: [115a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasım Ağa b. Veli’nin eşi Sâliha Hâtun’un isteğiyle yaptığı evin masraflarına mehrini takas yaptığı Mahmiye-i İstanbul’da Mismârî Şucâ‘ mahallesi sükkânından Kasım Ağa b. Veli meclis-i şer‘-i hatîr-ı lâzımü’t-tevkīrde kendinin zevcesi olan Sâliha bt. Halil nâm hâtun mahzarında ikrâr ve takrîr-i kelâm edip zevcem mezbûre Sâliha’nın silk-i mülk-i sahîhinde münselik olup mahalle-i mezbûrede vâki‘ bir tarafdan Medîne-i Münevvere -alâ münevverihâ eşrefü’s-salât ve ekmelü’t-tahiyye- vakfı olup Hamâmcı Zülfikār Ağa tasarrufunda olan menzil ve bir tarafdan Hanîfe Hâtun mülkü ve bir tarafdan kantarcı Halil mülkü ve bir tarafdan tarîk-i âm ile mahdûd menzil, harîk-i gālibde muhterik oldukda zevcem mezbûre Sâliha’nın emriyle kendi malımdan müceddeden binâsına yirmi bin akçe harc ve sarf eylemişdim hâlâ meblağ-ı mezbûrun on iki bin akçesin zevcem mezbûre Sâliha’nın yedinden ahz u kabz eyleyip meblağ-ı bâkī sekiz bin akçeyi zevcem mezbûre Sâliha’nın zimmetinde mütekarrir ve ma‘kūdun aleyh olan sekiz bin akçe mehr-i müecceline takās ol dahi mukāssa ve kabûl eyledi ba‘de’l-yevm menzil-i mahdûd-ı mezkûrda ve binâsında vechen mine’l-vücûh ve sebebin mine’l-esbâb hak ve alâkam olmayıp zevcem mezbûre Sâliha’nın hakk-ı sırfı ve mülk-i mahzıdır dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min Cemâziyelevvel li sene erba‘a ve seb‘în ve elf. Şuhûdü’l-hâl: Abdullah Efendi b. İbrahim, Mehmed Efendi b. Ali el-İmâm, Mustafa b. Mehmed, Mehmed b. Ali, Şaban Efendi b. ( ), Abdülazîz Beşe b. Şaban ve gayruhüm.