İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 831 Hüküm no: 1141 Orijinal metin no: [117b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müteveffâ Dimitraki v. Kosta’nın bir bağını hayatta iken büyük oğlu Kostantin’e verdiği Mahmiye-i İstanbul’da Fenerkapısı hâricinde Karabaş mahallesinde sâkin iken bundan akdem hâlik olan Dimitraki v. Kosta nâm zimmînin verâseti, sulbî kebîr oğulları Kostantin ve Vasilaki ve Mihalaki’ye ve sulbiye kebîre kızları Marola ve Cocone ve Zoyo ve Kokona ve Elene nâm nasrâniyyelere münhasıra olduğu şer‘an zâhir ve mütehakkik oldukdan sonra mezkûr Mihalaki asâleten ve mezbûre Elene tarafından husûs-ı âtîye vekîl olup vekâleti Yanaki v. Andriyas ve Papa Yakçı v. Petro nâm zimmî şehâdetleri ile şer‘an sâbite olan Zarako v. Mihalaki vekâleten mahfil-i kazâda, zikri âtî bağa vâzı‘u’l-yed olan mezkûr Kostantin muvâcehesinde her biri üzerine takrîr ve da‘vâ edip mahrûse-i Galata a‘mâlinden Beşiktaş nâhiyesine tâbi‘ Arnavud nâm karyede vâki‘ bağlar hilâlinde Ayazma ta‘bîr olunur mevzi‘e karîb bir tarafı Safer Ağa veresesi bağına ve bir tarafı ba‘zan Manol v. Kostantin bağına ve ba‘zan tarîk-i âma ve bir tarafı ba‘zan Yorgi bağına ve ba‘zan Minho bağına ve bir tarafı ba‘zan hâlik-i mezbûr bağına ve ba‘zan tarîk-i âma müntehî yüz çapalık bir kıt‘a mülk bağ hâlik-i mezbûrun ile’l-helâk mülkü olup ba‘de helâkihî verese-i mezkûrûna isâbet ve intikāl etmişken mezkûr Kostantin bağ-ı mezbûru bi gayri hakkın müstakillen zabt ve tasarruf eder, suâl olunup bağ-ı mezbûr on bir sehim i‘tibâr olunmağla iki sehim hisse-i şâyi‘adan mezkûr Kostantin kasr-ı yed ve bize teslîm etmesi asâleten ve vekâleten matlûbumuzdur dediklerinde gıbbe’s-suâl mezbûr Kostantin cevâbında bağ-ı mahdûd-ı mezkûr mülk-i müşterâsı olup hattâ babam hâlik-i mezbûr Dimitraki hâl-i hayâtında ve kemâl-i akl u sıhhatinde bağ-ı merkūm oğlum Kostantin’in mülk-i müşterâsıdır vechen mine’l-vücûh ve sebebin mine’l-esbâb benim hak ve alâkam ve medhalim yoktur deyû bi’d-defe‘ât alâ ru’ûsi’l-işhâd ikrâr ve işhâd eylemişdir ana binâ’en vaz‘-ı yed ederiz deyû def‘le mukābele edicek gıbbe’l-istintâk ve’l-inkâr mezkûr Kostantin’den def‘-i mezbûrunu mübeyyine beyyine taleb olundukda mahrûse-i mezbûre Kalafatçılar mahallesinde sâkin Mihal v. Hürmüz ve Petro v. Mihal nâm zimmîler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ hâlik-i mezkûr Dimitraki hâl-i hayâtında ve kemâl-i akl [u] sıhhatinde bağ-ı mahdûd-ı mezkûr oğlum mezbûr Kostantin’in mülk-i müşterâsıdır vechen mine’l-vücûh ve sebebin mine’l-esbâb benim için bağ-ı mezbûrda hak ve alâka yoktur deyû huzûrumuzda ikrâr ve bizi işhâd eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’s-sânî min Cemâziyelevvel li sene erba‘a ve seb‘în ve elf. Şuhûdü’l-hâl: Hüseyin Çelebi el-Hammâmî, Hasan Beşe er-Râcil, el-Hâc Ahmed b. Mahmud, Abdi Çelebi b. Hüseyin, Şükrullah Bey b. Mustafa, Pîrî b. Hüseyin ve gayruhüm.