İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 835 Hüküm no: 1146 Orijinal metin no: [118a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yeniçeri Mehmed Beşe’nin bağını Osman b. Kasım’a sattığı Dergâh-ı âlî yeniçerilerinin otuz ikinci ağa bölüğüne mahsûs oda ahâlîsinden Mehmed Beşe b. Abdullah nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Osman b. Kasım nâm kimesne mahzarında ikrâr ve takrîr-i kelâm edip silk-i mülkümde münselik olup vilâyet-i Rumeli’nde İstarova kazâsına tâbi‘ Esterlahşe nâm karyede vâki‘ bir tarafı Bayezid nâm kimesne bağı ve bir tarafı Sinan Beşe bağı ve bir tarafı Mustafa bağı ve bir tarafı tarîk-i hâs ile mahdûd ve mümtâz bir kıt‘a mülk bağımı, bin beş yüz nakid râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-ı şer‘î ile merkūm Osman’a bey‘ ol dahi minvâl-i muharrer üzre iştirâ ve kabûl edip semeni olan mezbûr bin beş yüz akçemi müşterî-i mezbûr Osman yedinden bi’t-tamâm ahz u kabz ettikden sonra mebî‘-i mezbûru mahallinde ahz u kabza mezbûr Osman’ı taslît eyledim dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Şuhûdü’l-hâl: Hasan Beşe b. Veli, Mehmed b. Mustafa, İbrahim b. Ali, Hasan b. Mehmed ve gayruhüm.