İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 835 Hüküm no: 1147 Orijinal metin no: [118a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saraylı Mâhruhsar Hâtun ile boşandığı eşi Mehmed Çelebi b. Abdullah arasında hiçbir dava kalmadığı Husûs-ı âti’l-beyânı mahallinde tahrîr için gıbbe’l-iltimâs kıbel-i şer‘den Mevlânâ Keşfî Mustafa Efendi irsâl olunup ol dahi mahmiye-i İstanbul’da Âşık Paşa mahallesinde fahrü’l-müderrisîni’l-kirâm Yahya Paşazâde demekle ma‘rûf Yahya Efendi b. Mehmed Efendi’nin sâkin olduğu menziline varıp zeyl-i rakīmde muharrerü’l-esâmî olan müslimîn huzûrlarında akd-i meclis-i şer‘-i şerîf eyledikde mahalle-i mezbûre sükkânından Mehmed Çelebi b. Abdullah meclis-i ma‘kūd-ı mezbûrda zevce-i mutallakası olup zâtı mahalle-i mezbûreden mûmâ-ileyh Yahya Efendi ve Mehmed Efendi b. Halil ta‘rîfleri ile mu‘arrefe olan bâ‘isetü hâzihi’l-vesîka Saraylı Mâhruhsar bt. Abdullah nâm hâtun mahzarında ikrâr ve takrîr-i kelâm edip mahalle-i mezbûrede vâki‘ eş-Şeyh Osman Efendi nâm sâhibü’l-hayrın vakfından olup üç tarafı vakf-ı mezbûrdan Hasan Reis ve Dilaver ve Ramazan Beşe tasarruflarında olan menzillere ve bir tarafı tarîk-i hâssa müntehî iki bâb fevkānî ve bir tahtânî odaları ve sofa ve müşterek su kuyusunu ve kenîf ve avluyu müştemil olup icâre-i mu‘accele ve yevmî iki akçe ücret-i müeccele ile tasarrufumda olan menzilimi, bi cümleti’t-tevâbi‘ ve’l-levâhık merkūme Saraylı Mâhruhsar Hâtun’a on bin beş yüz kırk akçe bedel mukābelesinde vakf-ı mezbûr mütevellîsi izni ile ferâğ ve tefvîz, ol dahi tefevvüz ve kabûl eyledikden sonra bedel-i ferâğ olan meblağ-ı mezbûr on bin beş yüz kırk akçeyi mutallaka-i mezbûre Mâhruhsar’ın zimmetimde mütekarrir ve ma‘kūdun aleyh olan on bir bin akçe mehr-i müecceli ile nafaka-i iddet-i ma‘lûme ve me’ûnet-i süknâsı için ta‘yîn olunan beş yüz kırk akçenin on bin beş yüz kırk akçesine takās edip ol dahi vech-i muharrer [118b] üzre mukāssa ve kabûl eyledikden sonra mehr-i müeccel-i mezkûrdan bâkī bin akçeyi dahi meclis-i ma‘kūd-ı mezbûrda Mâhruhsar yedine def‘ ve teslîm ol dahi tesellüm ve kabûl eyledi ba‘de’l-yevm zevciyyete müte‘allika âmme-i da‘vâdan her birimiz âharın zimmetini ibrâ-i âm ile ibrâ ve iskāt eyledik dedikde gıbbe’t-tasdîki’ş-şer‘î vâki‘ hâli Mevlânâ-yı mezbûr mahallinde tahrîr, ba‘dehû ma‘an irsâl olunan Abdullah Çelebi b. Abdülmennân ve Ahmed b. Abdülcebbar ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâbi‘ min Cemâziyelevvel li sene erba‘a ve seb‘în ve elf. Şuhûdü’l-hâl: Es-Seyyid Lütfullah b. es-Seyyid Emrullah, Mustafa Çelebi b. Mustafa el-Müezzin, Osman Çelebi b. Ali, Ahmed b. Abdülcebbâr ve gayruhüm mine’l-huzzâr.