İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 838 Hüküm no: 1151 Orijinal metin no: [118b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meryem bt. Ahmed’in evini Şeyh Mehmed b. Ahmed’e sattığı Mahmiye-i İstanbul’da Gül Câmi‘-i şerîfi mahallesinde sâkine Meryem bt. Ahmed meclis-i şer‘-i hatîr-i lâzımü’t-tevkīrde işbu bâ‘isü’l-kitâb Şeyh Mehmed b. Mehmed nâm kimesne mahzarında ikrâr ve takrîr-i kelâm, edip silk-i mülkümde münselik olup mahalle-i mezbûrede vâki‘ bir tarafı Sâime Hâtun vakfına ve bir tarafı Aynî Hâtun vakfına ve bir tarafı Ahmed b. Kapıcı Mehmed mülküne ve bir tarafı tarîk-i âma müntehî iki bâb fevkānî oda ve iki sofa ve altında ahır ve kenîf ve bir su kuyusu ve avluyu müştemil olan mülk menzilimi, merkūm Şeyh Mehmed’e yirmi altı bin nakid râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm ol dahi minvâl-i muharrer üzre iştirâ ve kabûl ve tesellüm eyledikden sonra semeni olan meblağ-ı mezbûr yirmi altı bin akçeyi müşterî-i mezbûr Şeyh Mehmed Efendi yedinden bi’t-tamâm ahz u kabz eyledim dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Hurrire fî târihi’l-mezbûr. Şuhûdü’l-hâl: İsmail Efendi b. Mehmed el-İmâm, Mehmed Çelebi b. el-Hâc Abdi, es-Seyyid Mehmed b. es-Seyyid Abdülkādir, Süleyman Efendi b. İbrahim, Feridun b. Ali, el-Hâc Yusuf b. Halil ve gayruhüm.