İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 837 Hüküm no: 1150 Orijinal metin no: [118b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sahak v. Laçin’in Ovanes v. Asvador’da alacağı olduğu iddiasını ispat edemediği Mahmiye-i İstanbul’da Şeyh Ferhad mahallesi sâkinlerinden Sahak v. Laçin nâm Ermeni dîvân-ı kāimmakām-ı sadr-ı a‘zamîde ma‘kūd mahfil-i kazâda, işbu hâmilü’s-sifr Ovanes v. Asvador nâm Ermeni mahzarında üzerine da‘vâ edip mezkûr Avanos zimmetinde cihet-i karzdan dört yüz seksen üç kıt‘a esedî guruş hakkım vardır, hâlâ taleb ederim suâl olunsun dedikde gıbbe’s-suâl ve akībe’l-inkâr, müdde‘î-i mezbûrdan müdde‘âsına mübeyyine beyyine taleb olundukda dört beş def‘a ityân-ı beyyine için istimhâl edip her kerede mehl-i şer‘î ile imhâl olunup ityân-ı beyyineye kudreti olmayıp ve yemîn dahi vermemeğin, mâ vaka‘a bi’t-taleb ketb olundu. Hurrire fi’l-yevmi’s-sânî min Cemâziyelevvel sene 1074. Şuhûdü’l-hâl: El-Hâc Ahmed b. Mahmud, Nasûh Beşe b. Yusuf, Abdi Çelebi b. Hüseyin, Şükrullah b. Mustafa ve gayruhüm.