İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 843 Hüküm no: 1156 Orijinal metin no: [120a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kadı Mehmed Efendi’nin Derviş Ali mahallesindeki evini Ahmed Efendi’ye sattığı Husûs-ı âti’l-beyânın mahallinde tahrîri iltimâs olunmağın, cânib-i şer‘-i celîl-i lâzımü’t-tebcîlden Mevlânâ Ömer Efendi b. İsmail irsâl olunup ol dahi mahmiye-i İstanbul’da Efdalzâde mahallesi sükkânından kıdvetü’l-müderrisîni’l-kirâm Hamîd Efendi b. Mustafa Efendi’nin menziline varıp zeyl-i kitâbda isimleri mastûr olan müslimîn mahzarlarında akd-i meclis-i şer‘-i mübîn eyledikde meclis-i ma‘kūd-ı mezbûrda mahmiye-i merkūmede Derviş Ali mahallesi sâkinlerinden olup Mısr-ı Kahire kuzâtından olan Mehmed Efendi b. Ahmed Efendi işbu sâhibü’l-kitâb umdetü’l-müderrisîni’l-kirâm zübdetü’l-muhakkikīni’l-fihâm Ahmed Efendi b. Hasan Efendi mahzarında ikrâr ve takrîr-i kelâm edip silk-i mülk-i sahîhimde münselik olup yine mezbûr Derviş Ali mahallesinde vâki‘ bir tarafdan umdetü’l-mevâliyyü’l-izâm Yakub Efendi mülkü ve bir tarafdan müşterî-i mezbûr mülkü ve bir tarafdan dahi ba‘zan müşterî-i mezbûr mülkü ve ba‘zan Ömer Beşe tasarrufunda olan menzil ve bir tarafı tarîk-i âm ile mahdûd, dâhiliyyesi iki bâb fevkānî oda ve bir sofa ve bir kenîf ve tahtânî bir mutfak ve bir kenîf ve avlu ve hâriciyyesi fevkānî iki oda ve bir sofa ve bir kenîf ve ahır ve bi’r-i mâ ve zât-ı eşcâr-ı müsmire ve gayr-ı müsmire bahçeyi müştemil mülk menzili nakd-i râyic fi’l-vakt yüz elli bin bin akçeye bey‘-i bât-ı sahîh-i şer‘î ile bey‘ ve teslîm edip ol dahi iştirâ ve kabûl ve kabz ve tesellüm eyledikden sonra semeni olan meblağ-ı mezbûr yüz elli iki bin akçeyi bi’t-tamâm yedlerinen alıp kabz eyledim ba‘de’l-yevm menzil-i mahdûd-ı mezbûr cemî‘ tevâbi‘ ve levâhıkı ve kâffe-i menâfi‘ ve merâfıkı ile müşterî-i mezbûr Ahmed Efendi hazretlerinin mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’l-vicâhî vâki‘ hâli Mevlânâ-yı mezbûr mahallinde tahrîr, ba‘dehû ba‘s olunan Abdullah Çelebi b. Abdullah ve Veli b. Mahmud ile meclis-i şer‘-i hatîre gelip alâ vukū‘ihi ihbâr ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâlis aşer min Cemâziyelevvel sene 1074. Şuhûdü’l-hâl: İftihârü’l-müderrisîni’l-kirâm Hamîd Efendi b. ( ), mefharü’l-müderrisîni’l-kirâm Edincikli Mehmed Efendi, Fahrü’l-eimme Ahmed Efendi b. Yusuf, Murad Çelebi, Yusuf Efendi b. Abdullah, Süleyman Beşe b. Halil ve gayruhüm