İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 844 Hüküm no: 1157 Orijinal metin no: [120a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kadı Mehmed Efendi b. Ahmed’in Ayşe bt. Sefer’e olan borcunu ödediğinden rehin bıraktığı evin rehninin kaldırıldığı Husûs-ı âti’z-zikrin mahallinde tahrîri için gıbbe’l-iltimâs cânib-i şer‘-i mutahhardan Mevlânâ Ömer Efendi b. İsmail irsâl olunup ol dahi mahmiye-i İstanbul’da Efdalzâde mahallesi sükkânından fahrü’l-müderrisîni’l-kirâm Hamîd Efendi b. Mustafa Efendi’nin menziline varıp zeyl-i rakīmde mastûr olan müslimîn mahzarlarında akd-i meclis-i şer‘-i kavîm eyledikde meclis-i ma‘kūd-ı mezbûrda mahmiye-i merkūmede Akşemseddin mahallesi sâkinelerinden Ayşe bt. Sefer Efendi nâm hâtun Mısr-ı Kahire kuzâtından Mehmed Efendi b. Ahmed Efendi mahzarında ikrâr ve takrîr-i kelâm edip bundan [akdem] mezbûr Mehmed Efendi silk-i mülkünde münselik olup mahmiye-i merkūmede Derviş Ali mahallesinde vâki‘ bir tarafdan umdetü’l-ulemâ’i’l-izâm Yakub Efendi mülkü ve bir tarafdan zübdetü’l-mehâdîmi’l-kirâm Hasan Efendizâde Ahmed Efendi mülkü ve bir tarafdan dahi ba‘zan mûmâ-ileyh Ahmed Efendi mülkü ve ba‘zan Ömer Beşe tasarrufunda olan menzil ve bir tarafdan tarîk-i âm ile mahdûd dâhiliyyesi fevkānî iki oda ve bir sofa ve kenîf ve tahtânî bir mutfak ve bir kenîf ve avlu ve hâriciyyesi iki fevkānî oda ve bir sofa ve bir kenîf ve ahır ve bi’r-i mâ ve zât-ı eşcâr-ı müsmire ve gayr-ı müsmire bahçeyi müştemil menzilini bin yüz yetmiş guruş deyn mukābelesinde ba‘de’t-tahliyye yedime rehin vaz‘ ve teslîm eylemiş idi hâlâ meblağ-ı mezbûr bin yüz yetmiş guruşu bi’t-tamâm yedinden alıp kabz eyleyip fekk-i rehin eyledim ba‘de’l-yevm menzil-i mahdûd-ı mezbûrda kat‘â alâka ve medhalim kalmadı dedikde gıbbe’t-tasdîki’l-mu‘teber vâki‘ hâli Mevlânâ-yı mezbûr mahallinde ba‘de’t-tahrîr ve ma‘an irsâl olunan Abdullah Çelebi b. Abdullah ve Veli b. Mahmud ile meclis-i şer‘-i hatîr-i lâzımü’t-tevkīre gelip alâ vukū‘ihi ihbâr ve takrîr etmeğin mâ vaka‘a bi’t-taleb ketb olundu Fi’l-yevmi’s-sânî aşer min Cemâziyelevvel li sene erba‘a ve seb‘în ve elf. Şuhûd[ü’l-hâl]: Es-Sâbikūn.