İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 848 Hüküm no: 1162 Orijinal metin no: [121a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nalçacı tâifesinden Oruc b. Mustafa’nın Sultan Selim çarşısında açmış olduğu dükkanı kapatması Mahmiye-i İstanbul’da Nalçacılar7 tâifesinin kethüdâları Bayram Beşe b. Mehmed ve şeyhleri el-Hâc Ahmed b. el-Hâc Mehmed ve ehl-i hibreleri es-Seyyid Sadi Çelebi b. es-Seyyid Nurullah ve es-Seyyid Mustafa Çelebi b. es-Seyyid Ali ve Yiğidbaşıları Yusuf Beşe b. Abdullah mahfil-i kazâda, tâife-i mezbûreden Oruc b. Mustafa mahzarında her biri takrîr-i kelâm edip kadîmden olan Nalçacı8 dükkânından gayrı dükkân ihdâs olunmamak için yedimizde müte‘addid evâmir-i şerîfe var iken mezkûr Oruc olugelmişe muhâlif mahmiye-i mezbûrede kadîmden olmayan Sultan Selim çarşısında Nalçacı dükkânı açmağla beynimizde küllî ihtilâle bâ‘is olmuşdur suâl olunup yedimizde olan emr-i şerîf mûcebince dükkândan çıkıp, kadîmden olan dekâkînden birine geçmeğe mezbûr Oruc’a tenbîh olunmak matlûbumuzdur deyû bin altmış iki senesi Cemâziyelevvelisi evâili ile müverraha tuğrâ-yı garrâ-yı sultânî ile mücellâ emr-i şerîf-i cihân-mutâ‘ ibrâz ve mezkûr Oruc muvâcehesinde kırâ’at ve istintâk olundukda mazmûn-ı emr-i şerîfi ve zikr olunan dükkân ihdâs ettiğini mu‘terif olmağın ber mûceb-i emr-i şerîf muhdes olan dükkân-ı mezbûrdan çıkıp kadîmden olan dekâkînden birine nakle mezbûr Oruc’a tenbîh birle mâ vaka‘a bi’t-taleb ketb olundu. Fi’l-yevmi’l-âşir min Cemâziyelevvel sene 1074. Şuhûdü’l-hâl: Abdi Çelebi b. Hüseyin, Şükür b. Mustafa, Baba Resûl b. Rıdvan, Ahmed Çelebi b. Mahmud ve gayruhüm.