İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 847 Hüküm no: 1161 Orijinal metin no: [121a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Seyyid Ahmed’in mülk menzilini el-Hâc İsâ b. Himmet’e sattığı Mahmiye-i İstanbul’da Akşemseddin mahallesi sâkinelerinden Ayşe bt. Seyyid Ahmed nâm hâtun meclis-i şer‘-i hatîr-i lâzımü’t-tevkīrde işbu sâhibü’l-kitâb el-Hâc İsâ b. Himmet mahzarında takrîr-i kelâm edip silk-i mülk-i sahîhimde münselik olup mahalle-i mezbûrede vâki‘ bir tarafı Osman Çelebi mülkü ve bir tarafı müşterî-i mezbûr el-Hâc İsâ mülkü ve bir tarafı ba‘zan imâma meşrûta vakıf menzil ve ba‘zan benim âhar mülk menzilim ve bir tarafı ba‘zan Mustafa Beşe ve ba‘zan tarîk-i hâs ile mahdûd ve fevkānî iki oda damlalıkları ile ve tahtânî iki oda ve bi’r-i mâyı ve cüneyneyi müştemil menzili nakd-i râyic fi’l-vakt yirmi beş bin akçeye bey‘-i bâtt-ı sahîh-i şer‘î ile bey‘ ve teslîm edip ol dahi iştirâ ve kabûl ve kabz ve tesellüm eyledikden sonra semeni olan meblağ-ı merkūm yirmi beş bin akçeyi bi’t-tamâm yedinden alıp kabz eyledim ba‘de’l-yevm menzil-i mahdûd-ı mezbûr cemî‘ tevâbi‘ ve levâhıkı ile müşterî-i merkūm el-Hâc İsâ’nın mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’l-vicâhî mâ vaka‘a bi’t-taleb ketb olundu. Fi’l-yevmi’r-râbi‘ aşer min Cemâziyelevvel li sene erba‘a ve seb‘în ve elf. Şuhûdü’l-hâl: Abdurrahman Efendi b. eş-Şeyh Ahmed el-İmâm, Halil Çelebi el-Müezzin, Mehmed b. Hasan, Mehmed b. Hüseyin el-İmâm, Ramazan b. Şaban, İbrahim Çelebi, Mustafa b. Hasan, Mustafa b. Mehmed, Ahmed b. Abdi, Hasan Bey bevvâb-ı sultânî, Abdi Çelebi b. Hüseyin, Mehmed [b.] Ramazan.