İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 849 Hüküm no: 1164 Orijinal metin no: [121a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bozacı Yuvan v. Niko’yu rencide etmemeleri hususunda Mehmed Beşe b. Murad ve Tanaş v. Yani’ye tenbih olunduğu Bozacı tâifesinden işbu hâmilü’s-sifr Yuvan v. Niko nâm zimmî mahfil-i kazâda tâife-i mezkûrenin kethüdâları Mehmed Beşe b. Murad ve ehl-i hibreleri Tanaş v. Yani mahzarlarında takrîr-i kelâm edip mukaddemâ ben Balat’da bozacı olmağla bin yetmiş üç senesine mahsûb olmak üzre tâifemize tarh olunan ordu ve kürekçi ve sâir şâkkadan cümle tâifemizin hesâbları üzre rızâ ve ma‘rifetleriyle hissemize isâbet eden cem‘an yirmi kıt‘a esedî guruşu kethüdâmız mezkûr Mehmed Beşe’nin emriyle mezkûr Tanaş’a teslîm edip sene-i mezbûrede tarh olunan cemî‘ tekâlîfden üzerimizde alacakları kalmadıkdan sonra zikr olunan Balat’da olan bozahâneden çıkıp kethüdâmız mezkûr Mehmed Beşe ve ehl-i hibremiz Tanaş ile tâifemizin cemî‘ ihtiyârlarının rızâ ve ma‘rifetleriyle sene-i mezbûre Şevvâlü’l-mükerreminin yirminci gününde Lütfi Paşa çarşısında vâki‘ bozahâneye ücretle geçip bozacılık işlerken mezkûrân Mehmed Beşe ve Tanaş sen âhar bozahâneye nakl eyledin sene-i mezbûreye mahsûb olmak üzre mukaddemâ bize tarh olunan ordu ve kürekçi ve sâir tekâlîf-i şâkkadan tekrâr hissene isâbet edeni ver, muhâlefet edersen seni ehl-i örfe gammaz edip sana bozacılık işletmeziz deyû beni tahvîf ve rencîde ederler suâl olunup men‘ u def‘ olunmak matlûbumdur dedikde gıbbe’s-suâl mezkûrân Mehmed Beşe ve Tanaş [cevâblarında], kaziyye bâlâda tafsîli mürûr ettiği vech üzre idiğine her biri mukır ve mu‘terif olmağın ba‘de’l-yevm vech-i meşrûh üzre mezkûr Yuvan’ı tahvîf ve rencîde etmemek üzre mezkûrân Mehmed Beşe ve Tanaş’a tenbîh birle mâ vaka‘a bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Abdülkerim Ağa b. ( ), Ahmed Çelebi b. Mahmud, Abdi Çelebi b. Hüseyin ve gayruhüm.