İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 850 Hüküm no: 1165 Orijinal metin no: [121b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sariye v. Faholli’nin Dimitri v. Yani’de olan alacağını taksitlendirdiği Mahmiye-i İstanbul’da Portakal cemâ‘atinden işbu hâmilü’s-sifr Sariye v. Faholli nâm yahudi meclis-i şer‘-i hatîr-i lâzımü’t-tevkīrde mahrûse-i Üsküdar’a tâbi‘ Çengel nâm karyede sâkin Dimitri v. Yani mahzarında ikrâr ve i‘tirâf edip mezbûr Dimitri zimmetinde cihet-i deyn-i şer‘îden on üç bin beş yüz akçe hakkım olup meblağ-ı mezbûru mezkûr Dimitri yedinden taleb ve da‘vâ eylediğimde beynimizde münâza‘ât-ı kesîre vukū‘undan sonra vesâtat-ı muslihîn ile da‘vâ-yı meşrûhamdan mezbûr Dimitri’yi beş bin yedi yüz akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûr beş bin yedi yüz akçeyi ayda üçer yüz akçe vermek üzre on dokuz ay tamâmına değin te’cîl edip mezkûr Dimitri dahi ecel-i mezbûru kabûl eyledi ba‘de’l-yevm meblağ-ı müeccel-i mezkûr beş bin yedi yüz akçeden mâ‘adâ mezbûrun zimmetini ibrâ-i âm ile ibrâ ve iskāt eyledim dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’r-râbi‘ min Cemâziyelevvel li sene 1071. Şuhûdü’l-hâl: Mustafa Çavuş el-Mübâşir, Abdurrahman Çelebi b. ( ), Abdi Çelebi b. Hüseyin, Mustafa Çelebi b. İsâ ve gayruhüm.