İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 853 Hüküm no: 1170 Orijinal metin no: [122a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Yasef v. Mosi’nin terekesinin üçte birinin vasiyeti gereği kız karındaşınin oğlu Mehmed Çavuş’a ait olduğu İşbu kitâb-ı sıhhat-nisâbın sâhibi Mehmed Çavuş nâm mühtedî, meclis-i şer‘-i hatîr-i lâzımü’t-tevkīrde kurâ-yı Edirne cemâ‘atinden olup bundan akdem hâlik olan Yasef v. Mosi nâm yahudinin hasren vârisi ve terekesine vâzı‘u’l-yed olan hâlik-i mezbûrun kız karındaşı oğlu Avraham v. Mosi nâm yahudi muvâcehesinde üzerine da‘vâ ve takrîr-i kelâm edip hâlik-i mezbûrun yetmiş târihinde hâl-i hayâtında ve kemâl-i sıhhatinde cemî‘ tasarrufâtı nâfiz olduğu hâlde hâlik olduğumda cemî‘ malımın sülüsü kız karındaşım oğlu mühtedî Mehmed Çavuş’a verile deyû vasiyyet edip musırran alâ îsâ’ihî mürd olmağla alâ mûcebi vasiyyet malının sülüsünü terekesine vâzı‘u’l-yed olan merkūm Avraham’dan taleb ederim, suâl olunup alıverilmek matlûbumdur dedikde gıbbe’s-suâl ve’l-inkâr müdde‘î-i mezbûr mühtedî Mehmed Çavuş’dan müdde‘âsını mübeyyine beyyine taleb olundukda cemâ‘at-i mezbûreden olup udûl-i ricâlden olan Menahem v. Alazar ve diğer Menahem v. Kalo ve Yehûda v. Mihail nâm kimesneler li ecli’ş-şehâde meclis-i şer‘a hâzırûn olup istişhâd olunduklarında, fi’l-vâki‘ hâlik-i mezbûr Yasef hâl-i hayâtında bin yetmiş senesinde bizim huzûrumuzda hâlik olduğumda cemî‘ malımın sülüsü kız karındaşım oğlu mühtedî Mehmed Çavuş’a verile deyû vasiyyet edip musırran alâ îsâ’ihî mürd olup alâ mûcebi vasiyyetihî hâlik-i mezbûrun terekesinin sülüsü mezbûr mühtedî Mehmed Çavuş’a isâbet ve intikāl eylemişdir. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm mâ vaka‘a bi’t-taleb ketb olundu. Fi’l-yevmi’s-sâbi‘ aşer min Cemâziyelevvel li sene erba‘a ve seb‘în ve elf. Şuhûdü’l-hâl: El-Hâc Ahmed b. Mahmud, Abdi Çelebi b. Hüseyin, Şükrullah Bey b. Mustafa, Veli b. Mahmud, Mehmed b. Ramazan, Abdülbâkī Efendi el-Müezzin, Usta Ali el-hallâk, Gazanfer b. Tevekkül.