İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 853 Hüküm no: 1169 Orijinal metin no: [122a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yako v. İlya’nın Sariye v. Faholli’de keçi derisi bedelinden dolayı alacağı olduğu Mahmiye-i İstanbul’da Dimetoka cemâ‘atinden Yako v. İlya nâm yahudi mahfil-i kazâda Portakal cemâ‘atinden Sariye v. Faholli nâm yahudi muvâcehesinde üzerine da‘vâ ve takrîr-i kelâm edip târih-i kitâbdan bir sene mukaddem keçi derisi iştirâ edivermek için mezkûr Sariye’ye otuz bin akçe vermişdim. Zikr olunan derileri bana iştirâ etmemeğin, hâlâ meblağ-ı mezbûru mezkûrdan taleb ederin suâl olunsun dedikde gıbbe’s-suâl mezbûr Sariye cevâbında fi’l-vâki‘ müdde‘î-i mezkûrdan keçi derisi iştirâ edivermek için meblağ-ı mezbûr otuz bin akçeyi ahz u kabz edip sâlifü’z-zikr derileri iştirâ edivermemişimdir deyû tav‘an mu‘terif olmağın mûcebince meblağ-ı mezbûru müdde‘î-i mezbûr Yako’ya edâ ve teslîme mezkûr Sariye’ye tenbîh birle mâ vaka‘a bi’t-taleb ketb olundu. Fi’l-yevmi’r-râbi‘ min Cemâziyelevvel li sene 1074. Şuhûdü’l-hâl: Mustafa Çavuş el-Mübâşir, Abdi Çelebi b. Hüseyin, Abdurrahman Çelebi b. Bâli, Şükrullah b. Mustafa ve gayruhüm.