İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 854 Hüküm no: 1172 Orijinal metin no: [122a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kostantin v. Yanaki’nin, Hayri b. Ali, Mustafa b. Yusuf ve Ali b. Mehmed’in limandaki gemisini çözerek parçalanmasına sebep olduklarına dair iddiasını ispat edemediği Eyâlet-i Trabzon’da Giresun kasabası sükkânından olup sefîne reislerinden Kostantin v. Yanaki nâm zimmî mahfil-i kazâda, Hayri b. Ali ve Mustafa b. Yusuf ve Ali b. Mehmed nâm kimesneler mahzarlarında üzerlerine takrîr-i da‘vâ edip Harnebe ta‘bîr olunur mülk sefînem fırtına ve rîh-i şedîd olmağla Giresun limanında ve Surkapı nâm mevzi‘de merbût iken mezkûrun Hasan ve Mustafa ve Ali amden sefînemi çözüp ol ân bilâ tevakkuf ve lâ tegayyür şiddet-i fırtınadan deryâya gidip pârelenip cümle âlâtı zâyi‘ olmuşdur suâl olunup ihkāk-ı hak olunmak matlûbumdur dedikde gıbbe’s-suâl mezkûrun cevâblarında, husûs-ı mezbûru bi’l-külliye inkâr edicek müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ve istihlâf etmeğin fi’l-vâki‘ müdde‘î-i mezbûrun amden merbût olan sefînesini çözmediklerine mezkûrun Hasan ve Mustafa ve Ali’ye yemîn teklîf olunduklarında [122b] anlar dahi alâ vefki’l-mes’ûl yemîn billâhi’l-aliyyi’l-a‘lâ etmeğin bilâ-beyyine mu‘ârazadan men birle mâ vaka‘a bi’t-taleb ketb olundu. Fi’l-yevmi’s-sânî aşer min Cemâziyelevvel li sene erba‘a ve seb‘în ve elf. Şuhûdü’l-hâl: Abdünnebî b. Abdülkādir, Mustafa b. Şükrullah, Ali b. İlyas, İslâm b. Hasan, Derviş b. Abdullah.