İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 855 Hüküm no: 1173 Orijinal metin no: [122b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiryazi v. Yani’nin Papa Filard v. Luka aleyhindeki bağ davasında sulh olduğu Vilâyet-i Anadolu’da Yalakābâd kazâsına tâbi‘ Katırlı nâm karye sükkânından Kiryazi v. Yani nâm zimmî meclis-i şer‘-i hatîr-i lâzımü’t-tevkīrde mahrûse-i Üsküdar’a tâbi‘ Heybeli nâm adada vâki‘ manastır ruhbânlarından işbu hâmilü’s-sifr Papa Filard v. Luka nâm râhib mahzarında ikrâr ve i‘tirâf edip silk-i mülkümde münselik olup zikr olunan Katırlı karyesi hilâlinde vâki‘ bir tarafı Kel Todori bağına ve bir tarafı sâhil-i bahre ve bir tarafı Todori v. Maral bağına ve bir tarafı tarîk-i âma müntehî eşcâr-ı müsmire ve gayrı müsmireyi hâvî bir kıt‘a mülk bağımı, değer bahâsı ancak beş bin akçeden ziyâde değmez deyû mezkûr Papa Filard beni tağrîr edip ben dahi vech-i muharrer üzre mağdûr olduğumdan gayrı bey‘ bi’l-vefâ olmak zu‘muyla Papa Filard’a bin altmış dokuz senesi Rebî‘ulevveli evâilinde beş bin akçe semen-i makbûza bey‘ ve teslîm ol dahi iştirâ ve tesellüm eyledikden sonra bey‘-i mezkûrda gabn-ı fâhiş olduğuna vâkıf ve âlim olduğumda, mezkûr Papa Filard üzerine vech-i meşrûh üzre da‘vâ eylediğimden sonra bey‘ bi’l-vefâyı dahi da‘vâ eylediğimde beynimizde münâza‘ât-ı kesîre cereyânından sonra vesâtat-ı muslihîn ile da‘vâ-yı meşrûhamdan mezkûr Papa Filard beni on beş bin akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûr on beş bin akçeyi meclis-i şer‘de tamâmen mezkûr Papa Filard yedinden ahz u kabz edip ba‘de’l-yevm husûs-ı mezbûra müte‘allik olan cemî‘ de‘âvî ve mütâlebât ve eymân ve muhâsamâtdan mezkûru ibrâ-i âm ile ibrâ ve iskāt eyledim min ba‘d mezkûr Papa Filard kıbelinde vechen mine’l-vücûh ve sebebin mine’l-esbâb benim için hak ve alâka kalmadı. Husûs-ı mezbûra müte‘allika benden bizzat veya vekîlimden da‘vâ sudûr ve zuhûr ederse lede’l-hükkâmi’l-kirâm mesmû‘a ve makbûle olmasın dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî aşer min Cemâziyelevvel li sene erba‘a ve seb‘în ve elf. Şuhûdü’l-hâl: Mehmed b. Ramazan, Abdullah Beşe b. ( ) er-Râcil, Yusuf b. Mansur, Resûl b. Rıdvan, Abdi Çelebi b. Hüseyin ve gayruhüm.