İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 858 Hüküm no: 1177 Orijinal metin no: [123a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Ağa b. Yusuf’un kölesi Mustafa b. Abdullah’ı azat ettiği İşbu bâ‘isü’l-kitâb çatık kaşlı, sarı elâ gözlü, uzun boylu efrenciyyü’l-asl Mustafa b. Abdullah meclis-i şer‘-i hatîr-i lâzımü’t-tevkīrde fi’l-asl Mora sâkinlerinden olup hâlâ Donanma-yı hümâyûn ile Âstâne-i sa‘âdet’e gelen Hasan Ağa b. Yunus nâm kimesne mahzarında da‘vâ ve takrîr-i kelâm edip ben mezbûr Hasan Ağa’nın bundan akdem abd-i memlûkü olduğum hâlde beni i‘tâk ve sâir ahrâr-ı asliyyîn zümresine ilhâk etmekle hür olmuş iken yine bana rakīk olmak üzre vaz‘-ı yed eder, suâl olunup kasr-ı yedine tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûr Mustafa’dan müdde‘âsını mübeyyine beyyine taleb olundukda udûl-i müslimînden Hâssa tabbâhlardan İbrahim b. Ramazan ve sa‘âdetlü kāim[makām] Paşa hazretlerinin ağalarından Şâhin Ağa b. Abdülmennân meclis-i şer‘a hâzırân olup istişhâd olunduklarında, mezbûr İbrahim merkūm Hasan Ağa benim huzûrumda müdde‘î-i mezbûr Mustafa malımdan âzâd eyledim deyû ikrâr ve beni işhâd eyledi ve merkūm Şâhin Ağa dahi bundan akdem mesfûr Hasan Ağa’ya Mustafa’yı satar mısın dediğimde, küçükden terbiye eyledim veledim ve oğlumdur deyû ikrâr ve beni işhâd eyledi, ol vechile ikimiz dahi mezbûr Mustafa’nın sâir ahrâr-ı asliyyîn gibi hür olduğuna şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Cemâziyelevvel li sene erba‘a ve seb‘în ve elf. Şuhûdü’l-hâl: Hüseyin Bey b. Hasan, Pehlivan Hamza Ağa b. Abdullah, Tülbentçi Musa Çelebi, el-Hâc Ahmed b. Mahmud, Abdi Çelebi b. Hüseyin.