İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 858 Hüküm no: 1176 Orijinal metin no: [123a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgaki v. Dimitraşko’nun vefat eden el-Hâc Kasım Ağa b. Abdülmennân’ın vârisleri Afife ve Fahri’ye borcu olduğunu kabul ettiği Husûs-ı âti’l-beyânın mahallinde tahrîri iltimâs olunmağın kıbel-i şer‘-i mutahhardan Mevlânâ Ömer Efendi b. İsmail irsâl olunup ol dahi mahmiye-i İstanbul’da Nişancı Cafer mahallesinde Yorgaki v. Dimitraşko nâm zimmînin menziline varıp zeyl-i kitâbda mastûrü’l-esâmî olan müslimîn mahzarlarında akd-i meclis-i şer‘-i mübîn eyledikde merkūm Yorgaki meclis-i ma‘kūd-ı mezbûrda mahmiye-i mezbûrede Şir Merd Çavuş mahallesi sâkinlerinden olup sâbıkan sekbanbaşı iken fevt olan el-Hâc Kasım Ağa b. Abdülmennân’ın sulbiye kızı Afife nâm sagīrenin vâlidesi ve tesviye-i umûruna kıbel-i şer‘den mansûbe vasîsi olan Ümmühânî nâm hâtun ile mezkûr el-Hâc Kasım Ağa’nın sulbiye kebîre kızı Fahri Hâtun taraflarından vekîl olup vekâleti zât-ı mezbûreyi ma‘rifet-i şer‘iyye ile ârifân olan Ahmed Beşe b. Abdullah ve el-Hâc Handan b. Abdülmennân şehâdetleriyle sâbite olan mezkûre Fahri Hâtun’un zevci Ali Ağa b. Abdurrahman mahzarında ikrâr ve takrîr-i kelâm edip sagīr-i mezbûr ile mezkûre Fahri Hâtun’a târih-i kitâbdan yüz seksen gün tamânına dek müeccel yüz altmış iki bin beş yüz akçe vâcibü’l-edâ ve lâzımü’l-kazâ deynim vardır dedikde gıbbe’t-tasdîki’l-vicâhî, vâki‘ hâli Mevlânâ-yı mezbûr mahallinde ba‘de’t-tahrîr, ma‘an ba‘s olunan Abdi Çelebi b. Hüseyin ve Nasûh Bey b. Yusuf ile meclis-i şer‘-i hatîre gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâdis aşer min Cemâziyelevvel li sene erba‘a ve seb‘în ve elf. Şuhûdü’l-hâl: Es-Sâbikūn.