İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 866 Hüküm no: 1186 Orijinal metin no: [124b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Dimo’nun, Kostantin v. Mizo’da olan alacağının ödenmesi Mahmiye-i İstanbul’da Kumkapı hâricinde meyhâneci tâifesinden Yorgi v. Dimo nâm zimmî dîvân-ı sa‘âdet-makrûnda ma‘kūd olan meclis-i şer‘-i hatîrde Kostantin v. Mizo nâm zimmî muvâcehesinde üzerine takrîr-i da‘vâ edip merkūm Kostantin zimmetinde deyn-i şer‘îden yirmi altı bin iki yüz akçe hakkım olup bundan akdem taleb ve da‘vâ eylediğimde inkâr etmeğin vesâtat-ı muslihîn ile merkūm Kostantin benim ile altı bin akçe üzerine inşâ-i akd-i sulh edip ben dahi sulh-ı mezbûru kabûl eylemiş idim hâlâ bedel-i sulh olan meblağ-ı merkūmu bana vermekde te‘allül eder suâl olunup alıvermek matlûbumdur dedikde gıbbe’s-suâl mezbûr Kostantin cevâbında kaziyye minvâl-i muharrer üzre olup bedel-i sulh-ı mezkûr altı bin akçe zimmetinde lâzımü’l-edâ deynimdir deyû bi tav‘ihî ikrâr ve i‘tirâf etmeğin ikrârı mûcebince bedel-i sulh olan meblağ-ı merkūm altı bin akçeyi müdde‘î-i mezbûr Yorgi’ye edâya mesfûr Kostantin’e tenbîh birle mâ vaka‘a bi’t-taleb ketb olundu. Hurrire fî târihi’l-mezbûr li seneti’l-merkūm. Şuhûdü’l-hâl: Mehmed b. Mehmed, Ali b. Hasan, Abdülkerim b. ( ), Nasûh Beşe b. Ahmed ve gayruhüm.