İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 865 Hüküm no: 1185 Orijinal metin no: [124b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emetullah Hâtun bt. Mehmed’in, boşandığı eşi Hasan Çelebi b. Mehmed’de olan mehrini aldığı Mahmiye-i İstanbul’da Debbâğ Yunus mahallesinde sâkine Emetullah Hâtun bt. Mehmed Efendi tarafından zikri âtî meblağı ahz u kabz ve ibrâya vekîl olup mezkûreyi ma‘rifet-i şer‘iyye ile ârifûn olan mahalle-i mezbûre sükkânından kutucu Hüseyin b. Cafer ve çiçekçi Hüseyin b. Hasan ve Mehmed b. Osman nâm kimesneler şehâdetleriyle şer‘an vekâleti sâbite olan mahalle-i mezbûre imâmı Abdullah Efendi b. Mehmed meclis-i şer‘-i hatîrde müvekkile-i mezbûrenin zevci Fahrü’l-eşbâh Hasan Çelebi b. Mehmed mahzarında bi’l-vekâle ikrâr ve i‘tirâf edip mezbûr Hasan Çelebi müvekkile-i mezbûre Emetullah’a dâhil olmadın talâk-ı bâyin ile tatlîk etmeğle, zimmetinde mütekarrir olan altı bin akçe mehr-i müeccel-i müsemmâsının nısfı lâzım gelmiş idi hâlâ meblağ-ı mezbûr altı bin akçenin nısfı olan üç bin akçesini meclis-i şer‘de merkūm Hasan Çelebi yedinden tamânen ahz u kabz edip zevciyyete ve gayra müte‘allika cemî‘ de‘âvî ve mütâlebât ve eymân ve muhâsamâtdan mezkûr Hasan Çelebi’yi ibrâ-i âm ile ibrâ ve iskāt eyledim dedikde mezbûr Hasan Çelebi ben dahi zevciyyete ve gayra müte‘allika olan cemî‘ de‘âvî ve mütâlebât ve eymân ve muhâsamâtdan müvekkile-i mezbûre Emetullah’ı ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min Cemâziyelevvel li sene erba‘a ve seb‘în ve elf. Şuhûdü’l-hâl: İbrahim Efendi b. el-Hâc Ali, Ali Efendi b. Mehmed el-İmâm, Yahya Bey b. Bâli, Veli Beşe b. Şaban, İvaz Çelebi b. Durak ve gayruhüm.